شارجہ چیمبر آف کامرس اینڈ انڈسٹری نے شارجہ میں باضابطہ طور پر پاکستان بزنس کونسل تشکیل دے دی

متحدہ عرب امارات اور پاکستان کی کاروباری برادری کے درمیان اقتصادی تعاون کو وسعت دینے کے لئے شارجہ چیمبر آف کامرس اینڈ انڈسٹری (ایس سی سی آئی) نے شارجہ میں باضابطہ طور پر پاکستان بزنس کونسل تشکیل دے دی، اس اقدام کا مقصد تجارت اور سرمایہ کاری کے تبادلے کو فروغ دینا، باہمی فائدے کے لئے دستیاب مواقع سے فائدہ اٹھانا اور جامع اقتصادی ترقی میں اس کے کردار کو بڑھاتے ہوئے نجی شعبے کی ترقی میں حصہ ڈالنا ہے۔ کونسل کی افتتاحی تقریب ایس سی سی آئی کے ہیڈ کوارٹر میں منعقد ہوئی جس میں شارجہ چیمبر آف کامرس اینڈ انڈسٹری کے چیئرمین عبداللہ سلطان ال اویس، متحدہ عرب امارات میں پاکستان کے سفیر فیصل نیاز ترمذی، شارجہ چیمبر کے وائس چیئرمین ولید عبدالرحمٰن بخاری اور پاکستان کے قونصل جنرل حسین محمد کے ساتھ چیمبر کے بورڈ آف ڈائریکٹرز کے اہم ممبران نے شرکت کی۔

اس موقع پر ایس سی سی آئی کے ڈائریکٹر جنرل محمد احمد امین العوادی، ایس سی سی آئی میں مواصلات اور کاروباری شعبے کے اسسٹنٹ ڈائریکٹر جنرل عبدالعزیز الشمسی، ایس سی سی آئی میں شعبہ بین الاقوامی تعلقات کی ڈائریکٹر فاطمہ خلیفہ المقرب اور پاکستان بزنس کونسل کی بانی کمیٹی کے چیئرمین سید محمد طاہر کے ساتھ ساتھ شارجہ میں پاکستانی تاجر برادری کے نمائندے بھی موجود تھے۔ عبداللہ سلطان ال اویس نے کہا کہ شارجہ میں پاکستان بزنس کونسل کا آغاز شارجہ چیمبر کی چھتری تلے کام کرنے والی بزنس کونسلز کے نیٹ ورک میں ایک اہم اضافہ ہے۔

انہوں نے مزید کہا کہ نئی کونسل ایس سی سی آئی کی حکمت عملی کا ایک کلیدی حصہ ہے جس میں کاروباری کونسلوں کی تعداد کو بڑھانا اور اقتصادی تعاون کو بڑھانے، تاجروں اور سرمایہ کاروں کے درمیان سرحد پار پارٹنرشپ کو فروغ دینے اور عالمی کاروبار کے ساتھ سرمایہ کاری اور تجارتی تعلقات کو مضبوط بنانے میں ان کے کردار سے فائدہ اٹھانا ہے۔ انہوں نے اس بات پر زور دیا کہ متحدہ عرب امارات اور پاکستان کے درمیان غیر معمولی قریبی اور تاریخی اعتبار سے بھرپور تعلقات ہیں جو سٹریٹجک اقتصادی اور تجارتی شراکت داری سے مزید مضبوط ہوئے ہیں جس میں مسلسل ترقی ہوئی ہے۔

متحدہ عرب امارات اور پاکستان کے درمیان نان آئل غیر ملکی تجارت کی مالیت 2022 میں 25.7 بلین درہم تک پہنچ گئی، جو کہ 2021 میں 19.8 بلین درہم کے مقابلے میں 30 فیصد زیادہ ہے۔ مزید برآں متحدہ عرب امارات پاکستان کے اہم اقتصادی شعبوں میں 10 بلین ڈالر کی سرمایہ کاری کے ساتھ آگے بڑھ رہا ہے۔ ال اویس نے نشاندہی کی کہ شارجہ میں پاکستان بزنس کونسل کا آغاز مضبوط بنیادوں پر استوار ہے۔ امید کی جاتی ہے کہ یہ پائیدار شراکت داری کو فروغ دینے اور دونوں کاروباری برادریوں کے درمیان تجارت اور سرمایہ کاری کو فروغ دینے میں اہم کردار ادا کرے گا اور دونوں فریقوں کی خواہشات کو پورا کرنے کے لئے دو طرفہ کاروباری تعلقات کو نئی بلندیوں تک لے جائے گا۔

انہوں نے مزید کہا کہ نئی کونسل پاکستانی کاروباری رہنماؤں کے لئے شارجہ کی کاروباری برادری کے ساتھ مزید گہرائی سے منسلک ہونے کا ایک گیٹ وے ہے۔ یہ خیالات اور بصیرت کے تبادلے میں سہولت فراہم کرنے، مختلف تجربات کی تلاش اور امارات میں سرمایہ کاری کے نئے منصوبوں کو شروع کرنے کے لئے ایک اہم پلیٹ فارم کے طور پر کام کرے گا۔ اس موقع پر فیصل نیاز ترمذی نے پاکستان بزنس کونسل کے آغاز میں شارجہ چیمبر کی اہم کوششوں اور تاجروں کے لئے اس کی مسلسل حمایت کی تعریف کی۔

انہوں نے کہا کہ یہ کوششیں روزگار کے مواقع میں نمایاں اضافہ کریں گی اور متنوع شعبوں میں جدت طرازی کو آگے بڑھائیں گی جس سے دونوں معیشتوں میں اہم اضافہ ہوگا۔ انہوں نے بزنس ٹو بزنس تعاون کے دائرہ کار پر روشنی ڈالتے ہوئے کہا کہ متحدہ عرب امارات اور پاکستان کے درمیان دو طرفہ تجارت کے فروغ کے بے پناہ امکانات ہیں۔ نئی کونسل پاکستانی تاجروں کو متحدہ عرب امارات میں اپنے کاروبار کو فروغ دینے، علاقائی منڈیوں میں وسعت دینے اور کانفرنسوں، تجارتی شوز، اور مندوبین کے تبادلے سمیت مشترکہ منصوبوں میں حصہ لینے کا موقع فراہم کرے گی۔

یہ پاکستانی کاروباری اداروں کے مفادات کی نمائندگی اور تحفظ بھی کرے گا، اس بات کو یقینی بناتے ہوئے کہ وہ شارجہ چیمبر کی جانب سے پیش کردہ متنوع خدمات سے فائدہ اٹھائیں گے۔دریں اثنا ء سید محمد طاہر نے شارجہ کی معیشت میں نجی شعبے کی شمولیت کو تقویت دینے اور دونوں ممالک کی کاروباری برادریوں کے درمیان مستقبل میں تعاون کے لئے نئی راہیں کھولنے میں کونسل کے اہم کردار کی طرف اشارہ کیا۔ افتتاحی تقریب میں شارجہ چیمبر آف کامرس کی چھتری تلے کام کرنے والی کاروباری کونسلوں کے مشن اور سٹریٹجک اہداف پر ایک پریزنٹیشن بھی دی گئی۔