نسٹیئن، اپنی پیشہ وارانہ مہارت، نیٹ ورکنگ اور فلاحی سرگرمیوں سے امریکہ میں اپنی شناخت بنا رہے ہیں، پاکستانی سفیر مسعود خان
امریکہ میں پاکستانی سفیر مسعود خان نے کہا ہے کہ نسٹیئن، پاکستان میں بھی ہمارے لئے باعث فخر ہیں اور وہ یہاں امریکہ میں بھی ہمارا سر فخر سے بلند کر رہے ہیں،امریکہ میں مقیم پاکستانی پیشہ ور افراد اور ماہرین نہ صرف اپنے متعلقہ شعبوں میں ایک منفرد شناخت بنا رہے ہیں بلکہ وہ اپنے آپ کو پاکستان اور امریکہ کا سب سے زیادہ پائیدار ربط ثابت کر رہے ہیں،ہمیں امریکہ میں موجود پاکستانی کمیونٹی اور ان کی امریکہ اور پاکستان میں خدمات پر فخر ہے۔ان خیالات کا اظہار انہوں نے امریکہ میں مقیم معروف پاکستانی تعلیمی ادارے نسٹ کے طلبا کی جانب سے قائم کردہ تنظیم نسٹیئن کی قیادت کے ساتھ ای میٹنگ کے دوران کیا۔
نسٹیئن نیشنل یونیورسٹی آف سائنسز اینڈ ٹیکنالوجی کے تقریباً 1200 سابق طلباء کا ایک مضبوط نیٹ ورک ہے جو فلاحی، تعلیمی، سائنسی اور ادبی سرگرمیوں میں سرگرم عمل ہے۔سفیر مسعود خان کو تنظیم کی تاریخ اور حاصل شدہ کامیابیوں کے بارے میں بریفنگ دیتے ہوئے صدر نسٹیئن ڈاکٹر عظیم سرور نے بتایا کہ تنظیم 7 علاقائی اور 17 مقامی ابواب پر مشتمل ہے اور اس کے ممبران امریکہ کی 180 معروف کمپنیوں اور 20 سے زیادہ یونیورسٹیوں میں خدمات انجام دے رہے ہیں۔ انہوں نے کہا تنظیم اپنے ممبران کو نوکری کی تلاش اور ان کو متعارف کرانے کے حوالے سے خدمات سر انجام دے رہی ہے۔ ڈاکٹر عظیم سرور نے کہا کہ تنظیم نے 2019 سے اب تک 1.57 ملین ڈالر اکٹھے کئے ہیں جو فلاحی سرگرمیوں کے لئے خرچ کئے جا رہے ہیں۔
انہوں نے کہا کہ نسٹیئن نے مختلف تعلیمی اداروں میں 26 سے زیادہ سکالرشپ انڈومنٹ سیٹیں قائم کی ہیں، رواں سال 13 انڈومنٹ سیٹیں بنائی گئیں اور 100 سے زائد طلباء کو مالی امداد فراہم کی گئی۔ڈاکٹر عظیم سرور نے کہا کہ نسٹیئن نے سیلاب سے متاثرہ افراد کے لئے امدادی سرگرمیوں کے ضمن میں محض چھ ہفتوں میں تقریباً 100,000 ڈالر جمع کئے ہیں۔
انہوں نے بتایا کہ یہ فنڈز نسٹ کے ذریعے جنوبی پنجاب، بلوچستان، سندھ اور خیبر پختونخواہ کے چار دیہاتوں میں بھیجے گئے۔انہوں نے پاکستانی سفیر کو سمر ریسرچ انٹرن شپ پروگرام، گریجویٹ کوچنگ، اڈاپٹ اے سکالر پروگرام، نسٹ سے فارغ التحصیل امریکہ میں موجود طلباء سے روابط کاری اور ان کا ڈیٹا بیس، ملازمت کی تلاش اور فنڈز اکٹھا کرنے کی کوششوں سمیت دیگر مختلف سرگرمیوں کے بارے میں بھی آگاہ کیا۔سفیر مسعود خان نے امریکہ میں پاکستانی پروفیشنل حضرات کا ایک مضبوط نیٹ ورک قائم کرنے پر نسٹیئن قیادت کی کاوشوں کو سراہا۔ انہوں نے نسٹیئن کے لئے نیک تمناؤں کا اظہار کیا اور ان کے مشن میں سفارت خانے کی جانب سے مکمل تعاون کا یقین دلایا۔
