حکومت گرین ٹیکنالوجی اور مقامی معیشت کے نمایاں فروغ کے اقدامات کے لئے پرعزم ہے، وزیر خزانہ محمد اورنگزیب

وفاقی وزیر خزانہ و محصولات سینیٹر محمد اورنگزیب نے کہا ہے کہ حکومت ایسے اقدامات کی حمایت کے لئے پرعزم ہے جن سے نہ صرف گرین ٹیکنالوجی بلکہ مقامی معیشت کو بھی نمایاں فروغ ملے گا۔ انہوں نے پاکستان میں بی وائی ڈی برانڈ کے اجرا سے خطاب کرتے ہوئے کہا کہ ان اقدامات سے روزگار کے نئے مواقع پیدا کرنے اور آٹوموٹو سیکٹر میں تکنیکی ترقی کو فروغ دینے میں مدد ملے گی ۔ وزارت خزانہ کی جانب سے جاری اعلامیے کے مطابق وفاقی وزیر نے پاکستان کے مستقبل کے لیے پائیدار جدت طرازی کی اہمیت پر زور دیا۔

سینیٹر اورنگ زیب نے بی وائی ڈی کی آمد کا خیر مقدم کرتے ہوئے کمپنی کی جدید ترین ٹیکنالوجی اور ماحولیاتی انتظام کے عزم کو اجاگر کیا۔ انہوں نے کہا کہ ہماری مارکیٹ میں بی وائی ڈی کا داخلہ صرف نئی گاڑیاں متعارف کرانے کے بارے میں نہیں ہے بلکہ یہ ایک پائیدار مستقبل کو اپنانے اور پاکستان کے ماحولیاتی اہداف کے ساتھ ہم آہنگ کرنے، توانائی کی بچت کے حصول کے بارے میں ہے۔

مزید برآں، انہوں نے کہا کہ بی وائی ڈی جیسے بڑے عالمی کھلاڑی کی موجودگی بڑھتی ہوئی الیکٹرک وہیکل مارکیٹ میں پاکستان کی برآمدی صلاحیت میں اضافہ کر سکتی ہے، ہائی ٹیک برآمدات میں اضافے اور تجارتی عدم توازن کو کم کرنے کے لئے قومی حکمت عملی کے ساتھ ہم آہنگ ہو سکتی ہے۔

وفاقی وزیر نے اس بات پر بھی زور دیا کہ حکومت اور صنعت کے اسٹیک ہولڈرز مل کر ایسی اختراعات متعارف کرانے کے لئے کام کریں گے جو آنے والے سالوں میں ملک کے استحکام کے اہداف اور معاشی استحکام میں کردار ادا کرسکیں۔ الیکٹرک گاڑیوں اور قابل تجدید توانائی کے حل میں عالمی سطح پر سب سے آگے بی وائی ڈی نے آج پاکستانی مارکیٹ میں نمایاں انٹری کرتے ہوئے ماحول دوست نقل و حمل کے ایک نئے دور کا وعدہ کیا ہے۔