سکیورٹی فورسز کا بلوچستان کے ضلع ہوشاب میں آپریشن ،دہشت گرد علی جان مارا گیا ،2 دہشت گرد زخمی

سکیورٹی فورسز کے بلوچستان کے ضلع ہوشاب میں آپریشن کے دوران دہشت گرد علی جان مارا گیا جبکہ 2 دہشت گرد زخمی ہوگئے۔

آئی ایس پی آر کے مطابق24 جولائی کو سکیورٹی فورسز نے بلوچستان کے ضلع ہوشاب میں انٹیلی جنس بیسڈ آپریشن کیا۔ سکیورٹی فورسز اور دہشت گردوں کے درمیان شدید فائرنگ کا تبادلہ ہوا جس کے نتیجے میں دہشت گرد علی جان کو جہنم واصل کر دیا گیا جبکہ دو دہشت گرد زخمی ہو گئے۔

مارے گئے دہشت گرد کے قبضے سے اسلحہ، گولہ بارود اور دھماکہ خیز مواد بھی برآمد ہوا، جو علاقے میں بے گناہ شہریوں کے اغوا اور ٹارگٹ کلنگ سمیت متعدد دہشت گردانہ کارروائیوں میں سرگرم رہے۔علاقے میں پائے جانے والے دوسرے دہشت گردوں کو ختم کرنے کے لئے سینی ٹائزیشن آپریشن کیا جا رہا ہے۔

آئی ایس پی آر کا کہنا ہے کہ پاکستان کی سکیورٹی فورسز قوم کے ساتھ مل کر بلوچستان کے امن و استحکام کو سبوتاژ کرنے کی کوششوں کو ناکام بنانے کے لئے پرعزم ہیں۔