نوجوان ملک کا سب سے بڑا اور قیمتی سرمایہ ہے جسے کسی صورت ضائع نہیں ہونے دیا جائے گا،سید عاصم منیر

آرمی چیف جنرل سید عاصم منیر نے کہا ہے کہ نوجوان ملک کا سب سے بڑا اور قیمتی سرمایہ ہے جسے کسی صورت ضائع نہیں ہونے دیا جائے گا۔ بدھ کو کنونشن سنٹر میں یوتھ کنونشن سے خطاب کرتے ہوئے انہوں نے کہا کہ علم انسان کو دوسروں سے ممتاز کرتا ہے جبکہ نوجوانوں کی آنکھوں میں چمک دیکھ کر یقین ہوتا ہے کہ پاکستان کا مستقبل محفوظ ہاتھوں میں ہے۔

آرمی چیف نے کہا کہ یہ ریاست کی ذمہ داری ہے کہ وہ عوام کو سوشل میڈیا سے پیدا ہونے والے کنفیوژن اور فتنہ کے مضر اثرات سے دور رکھے۔ انہوں نے کہا کہ عوام، حکومت اور فوج کے درمیان مضبوط رشتہ ہی پاکستان کی سلامتی اور ترقی کا ضامن ہے جو لوگ پاکستان کے دیوالیہ ہونے کا بیانیہ بنا رہے تھے وہ آج کہاں ہیں؟ آرمی چیف نے کہا کہ اگر آپ آزاد ریاست کی اہمیت جاننا چاہتے ہیں تو لیبیا، شام، کشمیر اور غزہ کے لوگوں سے پوچھیں، بطور مسلمان ہمیں مایوسی سے منع کیا گیا ہے۔