اے این ایف کا مختلف شہروں میں کریک ڈاؤن ، 10 کارروائیوں میں 11 ملزمان گرفتار
اینٹی نارکوٹکس فورس (اے این ایف) نے ملک کے مختلف شہروں میں منشیات سمگلنگ کے خلاف جاری کریک ڈاؤن کے دوران 10 کارروائیوں میں 11 ملزمان گرفتار کر لیے۔
اے این ایف ہیڈکوارٹر راولپنڈی سے جاری گزشتہ چوبیس گھنٹوں کی انسداد منشیات کارروائیوں کی تفصیلات کے مطابق تازہ کارروائیوں میں 58 لاکھ روپے سے زائد مالیت کی 32.914 کلوگرام چرس برآمد کی گئی۔راولپنڈی میں کوریئر آفس میں برطانیہ سے بھیجے گئے پارسل سے 24 گرام ویڈ برآمد کی گئی۔ایم ون موٹر وے اسلام آباد کے قریب گاڑی میں چھپائی گئی 12 کلو گرام چرس برآمد کر کے 2 ملزمان گرفتار کیے گئے۔
اسلام آباد میں ایم ون موٹر وے کے قریب ایک اور کارروائی میں ملزم سے 1.2 کلو گرام چرس برآمد کی گئی۔گوادر میں جیوانی کے غیر آباد علاقے میں چھپائی گئی 10 کلو گرام چرس برآمد کی گئی۔مہریہ ٹاؤن اٹک کے قریب ملزم کے قبضے سے 6 کلو گرام چرس برآمد کی گئی۔
اقبال شہید ٹول پلازہ جی ٹی روڈ اٹک کے قریب تین کارروائیاں کی گئیں ۔ان کارروائیوں میں 3 ملزمان کے قبضے سے 120 نشہ آور گولیاں، 290 افیون اور 136 گرام چرس برآمد کی گئی۔راولپنڈی میں سیٹلائٹ ٹاؤن کے قریب ملزم سے 1.2 کلو گرام چرس برآمد کی گئی۔سہراب گوٹھ الآصف سکوائر کراچی میں ٹرالی بیگ سے 2 کلو گرام ہیروئن برآمد کر کے 3 ملزمان گرفتار کیے گئے۔ ترجمان نے بتایا کہ گرفتار ملزمان کے خلاف انسداد منشیات ایکٹ کے تحت مقدمہ درج کر کے تحقیقات کا آغاز کر دیا گیا ہے۔
