میلبرن ٹیسٹ میں شکست: کیا بھارت اب بھی ٹیسٹ چیمپئن شپ کے فائنل میں پہنچ سکتا ہے؟

آسٹریلیا نے 5 میچز پر مشتمل بارڈر گواسکر ٹرافی کے چوتھے ٹیسٹ میں بھارت کو 184 رنز سے شکست دے کر سیریز میں 1-2 کی برتری حاصل کرلی اور ساتھ ہی مہمان ٹیم کی مشکلات میں اضافہ کر دیا۔

پیر کو میلبرن میں کھیلے جانے والے سیریز کے چوتھے ٹیسٹ میں بھارتی ٹیم 340 رنز کے تعاقب میں 155 رن بناکر آؤٹ ہوگئی اور یوں آسٹریلیا سیریز میں برتری حاصل کرتے ہوئے ورلڈ ٹیسٹ چیمپئن شپ کے فائنل میں جگہ بنانے کیلئے مضبوط پوزیشن میں آگیا۔

آسٹریلیا اور بھارت کے درمیان5 ٹیسٹ میچز کی سیریز کا آخری ٹیسٹ 3 جنوری سے سڈنی میں شروع ہوگا۔

یاد رہے کہ جنوبی افریقا نے پاکستان کو سنچورین ٹیسٹ میں شکست دے کر آئی سی سی ورلڈ ٹیسٹ چیمپئن شپ(ڈبلیو ٹی سی)کے فائنل کے لیے پہلے ہی کوالیفائی کر لیا جس کے بعد دوسری فائنلسٹ ٹیم کیلئے مقابلہ جاری ہے۔

میلبرن ٹیسٹ میں کامیابی کے بعد آسٹریلیا کے ورلڈ ٹیسٹ چیمپئن شپ (ڈبلیو ٹی سی) میں کوالیفائی کرنے کے امکانات مزید روشن ہو گئے جبکہ بھارت کو کافی مشکلات کا سامنا ہے۔