وزیراعظم محمد شہباز شریف کراچی کے ایک روزہ دورے پر روانہ

وزیراعظم محمد شہباز شریف کراچی کے ایک روزہ دورے پر روانہ ہو گئے ہیں۔ بدھ کو پی ایم آفس کے میڈیاونگ سے جاری بیان کے مطابق وزیراعظم کراچی پورٹ ٹرسٹ پر قائم ساؤتھ ایشیا پاکستان ٹرمینلز کا دورہ کریں گے۔

وزیراعظم کراچی پورٹ ٹرسٹ میں ایف بی آر کی کسٹمز کلیئرنس کے خودکار نظام کا افتتاح کریں گے، اس نظام کا مقصد کسٹمز کلیئرنس میں شفافیت اور کلیئرنس کے دورانیے میں کمی لانا ہے، وزیر اعظم نے اپنے گزشتہ دورہ کراچی میں اس خودکار نظام کے تنصیب کی ہدایات دی تھیں۔ وزیراعظم پاکستان سٹاک ایکسچینج کا دورہ کریں گے جس میں اس کی 2024 میں پوری دنیا کے دوسرے بہترین کارکردگی کے حامل سٹاک ایکسچینج کا اعزاز حاصل کرنے کی تقریب میں بطور مہمان خصوصی شرکت کریں گے۔

دورے میں وزیراعظم آغا خان یونیورسٹی میں کلینیکل پریکٹس کی ہدایت کے تقریب رونمائی میں بطور مہمان خصوصی شرکت کریں گے۔ نائب وزیر اعظم اور وزیر خارجہ محمد اسحاق ڈار،وفاقی وزیر اطلاعات و نشریات عطااللہ تارڑ ، وفاقی وزیر خزانہ محمد اورنگزیب، وزیر مملکت علی پرویز ملک اور کوآرڈینیٹر برائے صحت ڈاکٹر مختار احمد بھرتھ بھی وزیر اعظم کے ہمراہ ہیں۔