چیئرمین پاکستان کرکٹ بورڈ محسن نقوی سے وائٹ بال ٹیم کے نئے کپتان محمد رضوان اور نائب کپتان سلمان علی آغا کی ملاقات

چیئرمین پاکستان کرکٹ بورڈ محسن نقوی سے وائٹ بال ٹیم کے نئے کپتان محمد رضوان اور نائب کپتان سلمان علی آغا نے ملاقات کی جس میں چیئرمین پی سی بی نے کپتان محمد رضوان اور نائب کپتان سلمان علی آغا،آسٹریلیا اور زمبابوے سریز کے لئے نیک خواہشات کا اظہارکیا ۔

چیئرمین پی سی بی محسن نقوی کا کہنا تھا کہ وائٹ بال ٹیم کی قیادت ایک اعزاز ہے ۔ آسٹریلیا اور زمبابوے سیریز میں قوم کو آپ کی قیادت میں ٹیم سے اچھی کارکردگی کی توقع ہے۔پاکستانی ٹیم کے کھلاڑی با صلاحیت اور پروفیشنلز ہیں۔امید ہے کہ آپ کی قیادت میں ٹیم آسٹریلیا اور زمبابوے میں بہترین کارکردگی کا مظاہرہ کرے گی۔ متحد ہو کر کھیلنا اور آخری بال تک لڑنا کامیابی کی ضمانت ہے ۔

ٹیم اگر ٹیم بن کر پرفارم کرے گی تو کوئی آپ کو ہرا نہیں سکتا ۔کپتان محمد رضوان اور نائب کپتان سلمان علی آغا نے بھرپور اعتماد کرنے پر چئیرمین پی سی بی محسن نقوی کا شکریہ ادا کیا۔کپتان محمد رضوان نے کہا کہ دورہ آسٹریلیا و زمبابوے کے دوران بہترین کارکردگی دکھانے کے لیے پر عزم ہیں۔ قوم کی توقعات پر پورا اترنے کی بھرپور کوشش کریں گے۔

چیف آپریٹنگ آفیسر پی سی بی سلمان نصیر بھی اس موقع پرموجود تھے ۔کپتان محمد رضوان اور نائب کپتان سلمان علی آغا آج دیگر کھلاڑیوں کے ہمراہ آسٹریلیا روانہ ہوں گے۔