عصری سکیورٹی چیلنجز سے نمٹنے کے لیے تعلیم، تنقیدی سوچ اور اختراع کی اہمیت کی ضرورت ہے،آرمی چیف جنرل سید عاصم منیر

آرمی چیف جنرل سید عاصم منیر نے عصری سکیورٹی چیلنجز سے نمٹنے کے لیے تعلیم، تنقیدی سوچ اور اختراع کی اہمیت پر زور دیتے ہوئے طالب علموں کو غلط معلومات اور جعلی خبروں کے خطرات کے خلاف خبردار کیاہے۔

جمعرات کو آئی ایس پی آر سے جاری کردہ بیان کے مطابق 9مختلف ممالک کےہارورڈ بزنس سکول Trek-2024 کے 44 طلباء کے ایک وفد نےجنرل ہیڈ کوارٹرز میں آرمی چیف جنرل سید عاصم منیرسے ملاقات کی۔ انٹرایکٹو سیشن نے علاقائی امن و استحکام کو فروغ دینے میں پاکستان کے اہم کردار، دہشت گردی کے خلاف اس کی غیر متزلزل کوششوں اور جمہوری اقدار کو برقرار رکھنے کے عزم کے بارے میں نقطہ نظر کا اشتراک کرنے کا ایک پلیٹ فارم فراہم کیا۔آرمی چیف جنرل سید عاصم منیر نے عصری سکیورٹی چیلنجز سے نمٹنے کے لیے تعلیم، تنقیدی سوچ اور اختراع کی اہمیت پر زور دیا۔

انہوں نے پاکستان کی وسیع صلاحیتوں پر روشنی ڈالی اور حاضرین کو ذاتی تجربات کی بنیاد پر اپنی رائے قائم کرنے کی ترغیب دی۔ آرمی چیف نے ڈیجیٹل دور میں غلط معلومات اور جعلی خبروں کے خطرات کے خلاف بھی خبردار کیا اورطلباء پر زور دیا کہ وہ سمجھداری کے ساتھ اس منظر نامے کو سمجھیں۔ہارورڈ کے طلباء نے تعمیری اور روشن خیال بات چیت کی سہولت فراہم کرنے پر آرمی چیف کا شکریہ ادا کیا۔

یہ ملاقات 20 اگست کو جنرل ہیڈ کوارٹرز میں مختلف یونیورسٹیوں کے طلباء کے ساتھ پہلے کی بات چیت کے بعدکی ہے، جس میں قوم کے نوجوانوں کی پرورش اور حوصلہ افزائی کے ان کے عزم کو اجاگر کیا گیا ۔