وزیر اعظم محمد شہباز شریف کی سری لنکا کے صدر انورا کمارا ڈسانائیکے سے اقوام متحدہ جنرل اسمبلی کے 80ویں اجلاس کے موقع پر ملاقات ، باہمی تعلقات کو مزید مستحکم بنانے کے عزم کا اعادہ
پاکستان اور سری لنکا نے دوطرفہ تعلقات پر اطمینان کا اظہار کرتے ہوئے باہمی تعلقات کو مزید مستحکم بنانے کے عزم کا اعادہ کیا ہے۔ وزیراعظم آفس کے میڈیا ونگ کی طرف سے جاری بیان کے مطابق بدھ کو وزیر اعظم محمد شہباز شریف کی سری لنکا کے صدر انورا کمارا ڈسانائیکے سے اقوام متحدہ جنرل اسمبلی (یو این جی اے ) کے 80ویں اجلاس کے موقع پر ملاقات ہوئی۔ یہ ملاقات پاکستان اور سری لنکا کے درمیان موجودہ خیر سگالی تعلقات کی عکاس ہے۔
دونوں رہنماؤں کے درمیان بات چیت میں اعلیٰ سطح کے تبادلوں، دوطرفہ تجارت، تعلیم کے شعبے میں تعاون، ثقافتی تبادلوں اور دفاعی تعاون سمیت مختلف شعبوں میں تعاون کا جائزہ لیا گیا۔ ملاقات میں مختلف علاقائی اور عالمی امور پر بھی تبادلہ خیال کیا گیا۔ دونوں رہنماؤں نے پاک سری لنکا دوطرفہ تعلقات پر اطمینان کا اظہار کرتے ہوئے آئندہ برسوں میں باہمی تعلقات کو مضبوط سے مضبوط تر بنانے کے عزم کا اظہار کیا۔ وزیراعظم نے سری لنکا کے ساتھ تمام شعبوں میں دوطرفہ روابط بڑھانے کے پاکستان کے عزم کا اعادہ کیا اور مختلف بین الاقوامی فورمز پر دونوں ممالک کے درمیان قریبی تعاون کو سراہا۔ دونوں رہنماؤں نے کھیلوں بالخصوص کرکٹ میں تبادلوں کو بڑھانے اور دوطرفہ تعلقات کے فروغ کے لئے رابطے میں رہنے پر اتفاق کیا
