پاک سعودی باہمی دفاعی معاہدہ کی تیاری اور تکمیل میں آرمی چیف فیلڈ مارشل سید عاصم منیر کا کلیدی کردار، دونوں ممالک کے دیرینہ تعلقات اور دوستی تاریخی موڑ پر
پاکستان اور سعودی عرب کے درمیان تعلقات کا نیا تاریخی باب رقم ،سٹرٹیجک باہمی دفاعی معاہدہ کی تیاری اور تکمیل میں آرمی چیف فیلڈ مارشل سید عاصم منیر کا کلیدی کردار نمایاں ہے۔
جمعرات کو جاری تفصیلات کے مطابق پاکستان اور سعودی عرب کے دیرینہ تعلقات اور دوستی تاریخی موڑ پر ہیں ۔ وزیراعظم محمد شہباز شریف اور آرمی چیف فیلڈ مارشل سید عاصم منیر کا حالیہ دورۂ سعودی عرب کے دوران شاندار استقبال کیا گیا۔ اس بے مثال عزت و تکریم نے واضح کیا کہ یہ رشتہ محض سفارت تک محدود نہیں بلکہ حرمین شریفین اور روضۂ رسولؐ کی وجہ سے عقیدت اور اعتماد کی گہری بنیادوں پر قائم ہے۔
اس موقع پر دونوں ممالک نے سٹریٹجک باہمی دفاعی معاہدہ پر دستخط کیے، جو دفاعی تعاون اور مشترکہ سلامتی میں انقلابی پیش رفت ہے۔اس معاہدے کے تحت کسی بھی ملک پر جارحیت دونوں ممالک پر حملہ تصور ہوگی، جو دفاعی اتحاد اور مشترکہ تحفظ کو مضبوط بناتا ہے۔ معاہدے کے تحت پاکستان اب حرمین شریفین کے تحفظ اور سعودی عرب کی سلامتی میں ایک اسٹریٹجک پارٹنر بن گیا ہے۔
یہ معاہدہ دونوں ممالک کے کئی دہائیوں پر محیط فوجی تعاون، مشترکہ مشقوں اور دفاعی تعلقات کو ایک باقاعدہ اسٹریٹجک شراکت داری میں ڈھالتا ہے۔ اس معاہدہ سے نہ صرف خطے میں امن اور عالمی سلامتی کو فروغ ملے گا بلکہ اقتصادی، سفارتی اور عسکری میدانوں میں بھی وسیع مواقع پیدا ہوں گے۔
