ترسیلات زر کی 3 ارب ڈالر کی سطح مسلسل دوسرے مہینے برقرار رہنا بیرون ملک پاکستانیوں کا وزیراعظم کی پالیسیوں پر اعتماد کا مظہر ہے، وفاقی وزیر امیرمقام

وفاقی وزیر امور کشمیر و گلگت بلتستان انجینئر امیر مقام نے کہا ہے کہ جنوری 2025 میں ترسیلات زر میں 25 فیصد اضافہ اور مسلسل دوسرےماہ 3 ارب ڈالر کی سطح برقرار رہنا بیرون ملک پاکستانیوں کا وزیراعظم شہباز شریف کی پالیسیوں پر اعتماد کا مظہر ہے، اوورسیز پاکستانیوں کو خراج تحسین پیش کرتے ہیں۔

ان خیالات کا اظہاروفاقی وزیر امور کشمیر انجینئر امیر مقام نے کوالالمپور سے وطن روانگی کے وقت ہوائی اڈے پر گفتگو کرتے ہوئے کیا ۔ وفاقی وزیر نے کہا کہ بیرون ملک مقیم پاکستانیوں نے مسلسل دوسرے ماہ 3 ارب ڈالر سےزیادہ رقوم پاکستان بھیج کر بانی پی ٹی آئی کی کال کو مسترد کر دیا ہے ۔

انہوں نے کہا کہ بیرون ملک پاکستانیوں کی طرف سے ریکارڈ ترسیلات زر کا پاکستان آنا ثبوت ہے کہ تبدیلی آ چکی ہے ۔انجینئر امیر مقام نے کہا کہ اعداد وشمار سے پتہ چلتا ہے کہ خود ان کے حامیوں نے بھی انہیں مسترد کر دیا ہے۔انہوں نے کہا کہ جنوری 2025 میں ترسیلات زر میں 25 فیصد اضافہ ہوا ہے اور 3 ارب ڈالر کی سطح مسلسل دوسرے مہینے برقرار رہی جو بیرون ملک مقیم پاکستانیوں کا وزیراعظم شہباز شریف کی پالیسیوں پر اعتماد کا عکس ہے۔

انہوں نے کہا کہ درست معاشی پالیسیوں اور روپے کی قدر میں استحکام سے پاکستان کی ریاست اور عوام کو فائدہ ہوا ۔وفاقی وزیر نے کہا کہ پاکستان رقوم نہ بھجوانے کے اعلان کرنے والوں کا بیرون ملک پاکستانیوں نے بائیکاٹ کر دیا ہے۔انہوں نے کہا کہ آئی ایم ایف کی ایم ڈی نے بھی تسلیم کیا کہ پاکستان ترقی کے راستے پر چل پڑا ہے۔