7کھلاڑیوں کو ٹیم سے ڈراپ کرنےسے متعلق پی سی بی نے فیصلہ کچھ سوچ کر ہی کیا ہوگا: بابراعظم

قومی ٹیسٹ ٹیم کےکپتان بابر اعظم کا کہنا ہےکہ لارڈز ٹیسٹ کے اختتام پر 7 کھلاڑیوں کو ٹیم سے ڈراپ کرنے سے متعلق پی سی بی نے جو فیصلہ کیا ہے کچھ سوچ کر ہی کیا ہوگا۔

انگلینڈ کے خلاف لندن کے لارڈز کرکٹ گراؤنڈ پر ایجبسٹن ٹیسٹ سے ٹھیک ایک دن پہلے قومی ٹیسٹ ٹیم کے کپتان بابر اعظم پہلی بار میڈیا کے سامنے آئے۔

بابراعظم نے تیسرے ٹیسٹ کی ٹیم سے متعلق سوال کا جواب دیتے ہوئےکہا کہ کس کامبینیشن کے ساتھ کھیلنا ہے، تقریباً یہ طے کر چکے ہیں، ہم کنڈیشنز کے اعتبار سے بہترین ٹیم کو میدان میں اتاریں گے۔

لارڈز ٹیسٹ کے اختتام پر 7 کھلاڑیوں کو ٹیم سے ڈراپ کرنےکے سوال پرکپتان کا کہنا تھا کہ پی سی بی نے جو فیصلہ ہے کچھ سوچ کر ہی کیا ہوگا، وہ اس متعلق مزید بہتر بتاسکتے ہیں۔

لارڈز ٹیسٹ میں 194 رنز سے شکست پر بات کرتے ہوئے بابر اعظم بولے ہم اس بات کو تسلیم کرتے ہیں کہ لارڈز ٹیسٹ میں ٹیم نے کسی شعبے میں متاثر کن کھیل پیش نہیں کیا۔

انہوں نے پریس کانفرنس میں مزیدگفتگو کرتے ہوئےکہا کہ درست ہم سیریز ہار چکے ہیں لیکن خواہش ہےکہ اچھے انداز میں سیریز کا اختتام کریں، لہٰذا بطور ٹیم اچھی اور مثبت کرکٹ کے ساتھ سیریز کا اختتام کرنا چاہیں گے۔

قومی اسکواڈ میں شامل کیے جانے والے نئے لڑکوں کے سوال پر کپتان بابر اعظم بولے یہ دباؤ نہیں ان کے لیے خود کو ثابت کرنے کا بہترین اور شاندار موقع ہے۔