مسلم ایڈ پاکستان اور امریکی این جی او الائٹ کے آزاد کشمیر میں سکول سے باہر بچوں کے لئے معیاری تعلیم تک رسائی کو بڑھانے کیلئے مفاہمت کی یادداشت پر دستخط

مسلم ایڈ پاکستان اور امریکی این جی او الائٹ نے آزاد جموں و کشمیر میں سکول سے باہر بچوں کے لئے معیاری اور جامع تعلیم تک رسائی کو بڑھانے اور باہمی شراکت داری کو مضبوط بنانے کے لئے مفاہمت کی ایک یادداشت (ایم او یو) پر دستخط کئے ہیں۔ مسلم ایڈ کی جانب سے قائم مقام کنٹری ڈائریکٹر آصف چشتی اور الائٹ کی جانب سے ایگزیکٹو ڈائریکٹر برائے پاکستان و افغانستان ڈاکٹر طارق چیمہ نے دستخط کئے ۔

اس شراکت داری کا مقصد ایک مجوزہ چار سالہ تعلیمی اقدام کو آگے بڑھانا ہے جس کے تحت 60,000 سکول سے باہر بچوں میں سیکھنے تک رسائی کو بہتر بنانے، اساتذہ کی صلاحیتوں کو مضبوط و جامع بنانے اور بچوں کے لئے سیکھنے کے دوستانہ ماحول کی تشکیل پر توجہ دی جائے گی۔

اس اقدام میں سکول کے بنیادی ڈھانچے، اساتذہ کی ترقی اور کمیونٹی کی شمولیت میں بہتری کے ساتھ ساتھ 250 متبادل تعلیمی مراکز کے قیام کا تصور کیا گیا ہے۔ یہ شراکت داری اس بات کو یقینی بنانے کی طرف ایک اہم قدم کی نشاندہی کرتی ہے کہ ہر بچے کو سیکھنے، پڑھنے اور روشن مستقبل بنانے کا موقع ملے۔