پنجاب میں ملی بھگت سے گنے کی قیمت فکس کرنیوالا شوگر ملز کارٹل پکڑا گیا

مسابقتی کمیشن نے شوگر ملوں کا کارٹل پکڑ لیا۔

مسابقتی کمیشن نے پنجاب کی 10 شوگر ملوں کو کارٹل بنانے پر شوکاز جاری کرتے ہوئے کہا کہ شوگر ملوں نے گنے کی کرشنگ میں تاخیر کا فیصلہ گٹھ جوڑ بناکر کیا۔

اعلامیے میں کہا گیا ہے کہ شوگر ملوں نے کارٹل بنا کر گنےکی قیمت 400 روپے فی من فکس کی، گنے کی قیمت مقرر کرنے میں کسانوں کو نظر انداز کیا گیا۔

مسابقتی کمیشن کے اعلامیے میں بتایا گیا ہے کہ شوگر ملوں نے 10 نومبر کو ایک مل میں خفیہ میٹنگ کی، شوگر ملوں نے مشترکہ فیصلہ کیا کہ کرشنگ 28 نومبر سے شروع کی جائے گی۔

اعلامیے کے مطابق میٹنگ میں کئی شوگر ملوں کے نمائندے آن لائن بھی شامل ہوئے، کارٹل بنا کر قیمتیں فکس کرنا مسابقتی ایکٹ کی خلاف ورزی ہے۔

مسابقتی کمیشن نے 10 شوگر ملوں کو شوکاز نوٹس جاری کرتے ہوئے 14 دن میں تحریری جواب طلب کر لیا۔

اعلامیے میں کہا گیا ہے کہ کرشنگ میں تاخیر کی وجہ سے چینی کی مصنوعی قلت اور قیمتوں میں اضافے کا خدشہ ہے، جس شوگر مل میں خفیہ میٹنگ ہوئی اسے بھی شوکاز جاری کر دیا گیاہے۔