وزیراعظم محمد شہباز شریف سے ایران کی سپریم نیشنل سکیورٹی کونسل کے سیکرٹری علی اردشیر لاریجانی کی ملاقات ، زراعت، مواصلات سمیت باہمی طور پر فائدہ مند مختلف شعبوں میں دو طرفہ تعلقات بڑھانے پر اتفاق
پاکستان اور ایران نے زراعت، مواصلات سمیت باہمی طور پر فائدہ مند مختلف شعبوں میں دو طرفہ تعلقات کو بڑھانے پر اتفاق کیا ہے۔ وزیراعظم محمد شہباز شریف سے ایران کی سپریم نیشنل سکیورٹی کونسل کے سیکرٹری علی اردشیر لاریجانی نے منگل کو یہاں وزیر اعظم ہاؤس میں ملاقات کی۔ ڈاکٹر لاریجانی اس وقت پاکستان کے سرکاری دورے پر ہیں۔وزیر اعظم آفس کے میڈیا ونگ کی طرف سے جاری بیان کے مطابق وزیراعظم نے ایرانی مہمان کا خیرمقدم کرتے ہوئے دونوں ممالک کے درمیان تاریخی اور قریبی برادرانہ تعلقات کی اہمیت کو اجاگر کیا اور مختلف شعبوں میں دوطرفہ تعلقات کو مزید مضبوط اور وسیع کرنے پر زور دیا۔
ڈاکٹر لاریجانی نے بھی وسیع اور باہمی طور پر فائدہ مند شعبوں میں پاکستان ایران تعلقات کو بڑھانے کی ضرورت پر زور دیا۔ ملاقات کے دوران فریقین نے اہم علاقائی اور بین الاقوامی پیشرفت پر بھی تبادلہ خیال کیا جبکہ خطے میں امن و استحکام کو فروغ دینے کے لئے مربوط کوششوں کی اہمیت پر زور دیا۔ وزیراعظم نے علاقائی مسائل پر ایران کے اصولی مؤقف کو سراہا اور مشکل وقت میں پاکستان کے ساتھ ایران کی یکجہتی پر شکریہ ادا کیا۔
انہوں نے دونوں ممالک کے پرامن اور خوشحال مستقبل کے لئے ایران کے ساتھ مل کر کام کرنے کے لئے پاکستان کے عزم کا اعادہ کیا۔ ڈاکٹر لاریجانی نے حالیہ 12 روزہ جنگ کے دوران ایران کی غیر متزلزل حمایت پر پاکستانی قوم اور قیادت کا شکریہ ادا کیا اور تنازعات کے پرامن حل کے لئے مذاکرات اور سفارتکاری کی وکالت میں پاکستان کے تعمیری کردار کو سراہا۔
وزیراعظم نے ایران کے سپریم لیڈر سید علی خامنہ ای اور صدر مسعود پیزشکیان کے لئے احترام اور نیک خواہشات کا اظہار کیا اور پاکستان کی حمایت اور پاکستان-ایران تعلقات کو مضبوط بنانے کے عزم پر ان کا شکریہ ادا کیا۔ ملاقات میں طے پایا کہ نائب وزیراعظم اور وزیر خارجہ اسحاق ڈار کی قیادت میں ایک وفد جلد ایران کا دورہ کرے گا تاکہ دونوں ممالک کے درمیان مختلف شعبوں بالخصوص زراعت اور روابط/مواصلات میں تعاون کو مزید فروغ دیا جا سکے۔
