صدرِ آصف علی زرداری کا خیبر پختونخوا میں 15 خوارج کو ہلاک کرنے پر سکیورٹی فورسز کو خراجِ تحسین

صدرِ مملکت آصف علی زرداری نے خیبر پختونخوا میں دو کامیاب آپریشنز میں 15 خوارج کو ہلاک کرنے پر سکیورٹی فورسز کو خراجِ تحسین پیش کرتے ہوئے کہا ہے کہ وطنِ عزیز سے بیرونی پشت پناہی میں سرگرم دہشت گردوں کا مکمل خاتمہ قومی اتفاقِ رائے سے جاری رہے گا۔

منگل کو ایوانِ صدر کے پریس وِنگ سے جاری بیان کے مطابق صدرِ مملکت نے کہا کہ بھارتی پشت پناہی یافتہ فتنہ الخوارج کے کارندوں بشمول سرغنہ عالم محسود کا مارا جانا سکیورٹی فورسز کی کامیاب حکمت عملی کی بدولت ہے۔ انہوں نے کہا کہ ”عزمِ استحکام“ کے تحت جاری انسداد دہشت گردی مہم ملک میں پائیدار امن کے قیام کی قومی کاوشوں کی مظہر ہے۔

صدرِ مملکت نے واضح کیا کہ انتہاپسندی و دہشت گردی کے خلاف قومی اتفاقِ رائے میں خلل ڈالنے کیلئے کسی سطح پر کوئی سیاسی چال یا توجہ بٹانے کی کوشش برداشت نہیں کی جائے گی۔ صدر آصف علی زرداری نے سکیورٹی فورسز اور قانون نافذ کرنے والے اداروں کے عزم و بہادری کو سلام پیش کرتے ہوئے کہا کہ اللّہ کے فضل سے پاک سرزمین کو جلد ہر خارجیوں کے شر سے پاک کردیا جائے گا۔