وفاقی وزیر داخلہ محسن نقوی سے یوکے کی نیشنل کرائم ایجنسی کے ڈی جی گرائم بیگر کی ملاقات،انسداد منشیا ت سمیت دیگرشعبوں میں تعاون بڑھانے پر اتفاق

وفاقی وزیر داخلہ محسن نقوی سے برطانیہ کی نیشنل کرائم ایجنسی (این سی اے)کے ڈائریکٹر جنرل گرائم بیگر نے ملاقات کی جس دوران انسداد منشیات اوراین سی سی آئی اے سمیت مختلف اداروں کے افسران کےلئے تربیتی کورسز میں باہمی تعاون بڑھانے،بچوں کی آن لائن ہراسانی کے سدباب کے لیے باہمی اشتراک کار و کوآرڈینیشن مؤثر بنانے اورایکسٹراڈیشن کے حوالے سے دوطرفہ معاونت بڑھانے کے حوالے سے اتفاق کیا گیا۔

جمعرات کو وزارت داخلہ سے جاری بیان کے مطابق ملاقات میں برطانوی ہائی کمشنر جین میریٹ، نیشنل کوآرڈینیٹر نیکٹا، ڈی جی این سی سی آئی اے، ڈی جی نیشنل فرانزک ایجنسی، ایڈیشنل سیکرٹری داخلہ، چیف کمشنر اور آئی جی اسلام آباد بھی موجود تھے۔

ملاقات میں انسدادِ دہشت گردی و منشیات، انسانی سمگلنگ، فرانزک، امیگریشن اور پولیس ٹریننگ کے شعبوں میں تعاون بڑھانے پر تفصیلی تبادلہ خیال کیا گیا جبکہ انسداد منشیات،این سی سی آئی اے سمیت مختلف اداروں کے افسران کےلئے تربیتی کورسز میں باہمی تعاون بڑھانے ،بچوں کی آن لائن ہراسانی کے سدباب کے باہمی اشتراک کار و کوآرڈینیشن مؤثر بنانے کا فیصلہ اورایکسٹراڈیشن کے حوالے سے دوطرفہ معاونت بڑھانے پر اتفاق کیا گیا۔برطانیہ اور پاکستان کے درمیان ایکسٹراڈیشن اور دیگر شعبوں میں تعاون کے حوالے سے 5 ایم او یوز کو جلدی حتمی شکل دی جائے گی۔

ڈی جی این سی اے گرائم بیگر نے اسلام آباد میں خودکش حملے کی مذمت کرتے ہوئے جانی نقصان پرافسوس کا اظہارکیا۔ وزیر داخلہ محسن نقوی نے کہا کہ دہشت گردی کے تمام تانے بانے ہمسایہ ملک سے ملتے ہیں،دہشتگردی کے خلاف جنگ میں پاکستان کے عزم و استقامت کی مثال دنیا دینے سے قاصر ہے۔

انہوں نے کہا کہ جدید فرانزک اور ٹریننگ سے قانون نافذ کرنے والے اداروں کی صلاحیتوں میں مزید اضافہ ممکن ہے،اپسکیل کے تعاون سے غیر قانونی امیگریشن روکنے کے لئے موثر اقدامات کئے جارہے ہیں۔ڈی جی برطانوی نیشنل کرائم ایجنسی گرائم بیگر نے کہا کہ حکومت پاکستان کے ساتھ مختلف شعبوں میں تعاون کر رہے ہیں۔ انہوں نے انسداد منشیات کے ضمن میں پاکستان کی کاوشوں کو سراہا۔