ججز کے تبادلے پرپی پی کی تجویز اچھی ہے، حکومت ضرور غور کرے گی: وزیر مملکت

وزیر مملکت برائے قانون بیرسٹر عقیل ملک نے کہا ہے کہ ججز کے تبادلے پرپیپلزپارٹی کی تجویز اچھی ہے، حکومت ضرور غور کرے گی۔

جیو نیوز کے پروگرام آج شاہ زیب خانزادہ کے ساتھ میں گفتگو کرتے ہوئے بیرسٹرعقیل ملک کا کہنا تھاکہ ججز کے تبادلے میں انتظامیہ کا کردار نہیں ہونا چاہیے۔

انہوں نے کہا کہ ججز کے تبادلے پرپیپلزپارٹی کی تجویز اچھی ہے، حکومت ضرور غور کرے گی، اراکین کی دہری شہریت نہیں ہوسکتی تو بیوروکریسی کی کیوں ہو، نہیں معلوم بلاول نے بیوروکریسی کی دہری شہریت نہ ہونے پرکیوں اتفاق نہیں کیا۔

ان کا کہنا تھاکہ میثاق جمہوریت کے وقت دہشت گردی کی صورت حال ایسی نہیں تھی جیسی آج ہے، بلاول نے کہا تھا کہ آئینی عدالت کے حوالے سے ہم آہنگی موجود ہے، آئینی عدالت کو پیپلزپارٹی میثاق جمہوریت کے دیگرنکات پر عمل سے مشروط نہ کرے۔

وزیر مملکت کا کہنا تھاکہ ہم 18ویں ترمیم کو لپیٹنے اور کسی صوبےکے اختیارات کم کرنے کی بات نہیں کررہے، اگرمرکزی نکات پراتفاق ہوگیا ہے توہم آگے بڑھیں گے، بعد میں 28ویں ترمیم بھی آسکتی ہے۔

انہوں نے کہا کہ آئینی عدالت کے ججزکی ریٹائرمنٹ کی عمر 68 کرنے کی تجویز ہے۔