چین کی معاشی، سماجی اور عسکری میدان میں غیر معمولی کامیابیاں پورے خطے کے استحکام اور خوشحالی کا باعث ہیں، وفاقی وزیر داخلہ محسن نقوی کا عوامی جمہوریہ چین کے 76ویں قومی دن پرپیغام

وفاقی وزیر داخلہ محسن نقوی نے عوامی جمہوریہ چین کے 76ویں قومی دن پر چینی قیادت، کمیونسٹ پارٹی اور عوام کو مبارکباد پیش کرتے ہوئے کہا ہے کہ چین نے مختصر مدت میں معاشی استحکام اور پائیدار ترقی کے خواب کو عملی تعبیر دی ہے اور استقامت، اصولوں کی پاسداری اور اجتماعی فلاح کے جذبے سے دنیا میں بلند مقام حاصل کیا ہے۔محسن نقوی نے اپنے پیغام میں کہا کہ چین کی معاشی، سماجی اور عسکری میدان میں غیر معمولی کامیابیاں نہ صرف اس کی اپنی ترقی بلکہ پورے خطے کے استحکام اور خوشحالی کا باعث ہیں۔

انہوں نے چین کی شاندار تاریخ، ثقافتی ورثے اور حیرت انگیز ترقی کو خراجِ تحسین پیش کرتے ہوئے کہا کہ پاک چین تعلقات تاریخی، اسٹریٹجک اور مضبوط شراکت داری پر مبنی ہیں۔انہوں نے کہا کہ سی پیک جیسے عظیم منصوبے اس شراکت داری کی روشن مثال ہیں جبکہ ہمالیہ کی فلک بوس چوٹیاں، سمندر کی گہرائیاں اور قراقرم کی سنگلاخ راہیں پاک چین لازوال دوستی کی گواہ ہیں۔ وزیر داخلہ نے کہا کہ چین نے ہر بحران، علاقائی تناؤ یا داخلی چیلنج کے دوران پاکستان کا بھرپور ساتھ دیا ہے اور یہی وجہ ہے کہ چین کے ساتھ تعلقات پاکستان کی خارجہ پالیسی کا مستقل اور مرکزی ستون ہیں۔

انہوں نے کہا کہ گوادر سے خنجراب تک اور توانائی سے مواصلات تک، چین نے پاکستان کی معاشی بنیادوں کو مستحکم کرنے میں کلیدی کردار ادا کیا ہے۔ انہوں نے کہا کہ پاک چین اسٹریٹجک شراکت داری خطے میں توازن اور ترقی کی بنیاد ہے۔وفاقی وزیر داخلہ نے قومی دن پر چینی قوم کی لگن، محنت اور جدت پسندی کو سلام پیش کرتے ہوئے ان کی مزید ترقی، کامرانی اور عروج کے لیے نیک تمناؤں کا اظہار کیا۔