وزیراعظم محمد شہباز شریف سے ترکیہ کے وزیر برائے قومی دفاع یاسر گلر کی ملاقات، تجارت، سرمایہ کاری، ٹیکنالوجی اور دفاع سمیت مختلف شعبوں میں تعاون کو مزید مضبوط بنانے کیلئے پاکستان کے غیر متزلزل عزم کا اعادہ

وزیراعظم محمد شہباز شریف نے ترکیہ کے ساتھ تجارت، سرمایہ کاری، ٹیکنالوجی اور دفاع سمیت مختلف شعبوں میں تعاون کو مزید مضبوط بنانے کے لیے پاکستان کے غیر متزلزل عزم کا اعادہ کیا ہے۔ منگل کو وزیراعظم آفس کے میڈیا ونگ سے جاری بیان کے مطابق وزیراعظم نے ان خیالات کا اظہار ترکیہ کے وزیر برائے قومی دفاع یاسر گلر سے گفتگو کرتے ہوئے کیا جنہوں نے وزیراعظم ہائوس میں ان سے ملاقات کی۔ یاسر گلر پاک ترک مشترکہ وزارتی کمیشن کے شریک چیئرمین کی حیثیت سے پاکستان کے دورے پر ہیں۔ ترک وزیر دفاع اور ان کے وفد کے ارکان کا پرتپاک خیرمقدم کرتے ہوئے وزیراعظم نے پاکستان اور ترکیہ کے درمیان تاریخی اور برادرانہ تعلقات کا ذکر کیا جو مشترکہ تاریخ، ثقافت اور باہمی احترام پر مبنی ہیں۔ انہوں نے دوطرفہ تعلقات کے مثبت رجحان پر اطمینان کا اظہار کیا اور تجارت، سرمایہ کاری، ٹیکنالوجی اور دفاع سمیت مختلف شعبوں میں ترکی کے ساتھ تعاون کو مزید مضبوط بنانے کے لیے پاکستان کے غیر متزلزل عزم کا اعادہ کیا۔

چین میں شنگھائی تعاون تنظیم کے سربراہان مملکت کے اجلاس کے موقع پر صدر رجب طیب ایردوان کے ساتھ اپنی ملاقات کا ذکر کرتے ہوئےوزیر اعظم نے قیادت سمیت تمام سطح پر متواتر رابطے کے ذریعے پاک ترک تعلقات کو مزید مضبوط بنانے کے لیے پاکستان کے عزم کا اعادہ کیا۔ وزیر اعظم شہباز شریف نے خاص طور پر مشترکہ کوششوں کے ذریعے دو طرفہ تجارت میں 5 ارب ڈالر کے باہمی متفقہ ہدف کے حصول کے لیے کام کرنے کی ضرورت پر زور دیا۔ پاکستان کی سرمایہ کار دوست پالیسیوں پر روشنی ڈالتے ہوئے وزیراعظم نے ترک کمپنیوں کو پاکستان میں اپنی سرمایہ کاری کا دائرہ بڑھانے کی دعوت بھی دی۔ فریقین نے ایک دوسرے کے بنیادی قومی مفادات کے لیے اپنی مضبوط اور مستقل حمایت کا اعادہ کیا اور پاکستان اور ترکیہ کے درمیان سٹریٹجک شراکت داری کو مزید بہتر کرنے کے لیے مل کر کام جاری رکھنے پر اتفاق کیا۔ملاقات کے بعد وزیراعظم کی جانب سے ترک وزیر دفاع اور پاک ترک مشترکہ وزارتی کمیشن کے اراکین کے اعزاز میں عشائیہ بھی دیا گیا۔