کراچی: دو دریا پر بچوں کیساتھ سمندر میں کودنے والے ٹیچر کی لاش مل گئی

سی ویو دو دریا پر دو کم عمر بچوں کے ساتھ سمندر میں چھلانگ لگانے والے اسکول ٹیچر اورنگزیب عالم کی لاش مل گئی۔

ریسکیو حکام نے بتایا کہ اسکول ٹیچر اورنگزیب عالم نے دو روز قبل اپنی بیٹی اور بیٹے کے ساتھ سمندر میں چھلانگ لگائی تھی، گزشتہ روز دونوں بچوں کی لاشیں سمندر سے نکالی گئی تھیں اور آج ان کے والد کی لاش بھی مل گئی۔

گزشتہ روز اورنگزیب عالم کے قریبی دوست کا اہم بیان سامنے آیا تھا جس میں اس نے اسکول ٹیچر کی خودکشی کرنے کی وجہ بیان کی تھی۔

دوست کا کہنا تھا کہ اورنگزیب عالم میرا دوست تھا، اس کا بیوی سے جھگڑے کے باعث عدالت میں معاملہ چل رہا تھا، گزشتہ روز عدالت میں دونوں موجود تھے عدالت سے نکلنے کے بعد وہ اپنے بچوں سمیت چلا گیا اور واپس نہیں آیا۔

انہوں نے بتایا کہ رات کو خبریں دیکھ کر اندازہ ہوا کہ شاید اورنگزیب عالم ہی نے خودکشی کی ہے، ابھی بچے کی لاش دیکھی تو پتا چلا احمد کی ہے گھریلو جھگڑے عدالتی کیس سے پریشان ہو کر اس نے انتہائی قدم اٹھایا۔

واضح رہے کہ اسکول ٹیچر متوفی اپنے بیٹے اور بیٹی کو ساتھ لے کر سی ویو کے قریب دو دریا پر پہنچا اور تینوں نے سمندر میں چھلانگ لگا دی تھی۔

ریسکیو اداروں کی جانب سے فوری طور پر امدادی کارروائی شروع کی گئی تھی جس کے دوران ایک بچے کی لاش سمندر سے نکال لی گئی۔

ابتدائی معلومات کے مطابق متوفی اورنگی ٹاؤن ساڑھے 8 نمبر کا رہائشی تھا اور عامر پبلک اسکول میں بطور استاد فرائض انجام دے رہا تھا