پاک چین دفاعی اشتراک لازوال دوستی کی روشن علامت ہے، وزیر اعلیٰ پنجاب

لاہور (1 اگست 2025): وزیر اعلیٰ پنجاب مریم نواز نے چین کی پیپلز لبریشن آرمی کے 98واں یوم تاسیس پر چینی حکومت، عوام اور مسلح افواج کو مبارکباد دی۔

یوم تاسیس کے موقع پر مریم نواز کی جانب سے جاری بیان میں کہا گیا کہ چین کی مسلح افواج کا قومی و عالمی امن کیلیے کردار قابل تحسین ہے اپنے آہنی بھائی کو سلام پیش کرتے ہیں۔

مریم نواز نے کہا کہ پاک چین تعلقات صرف ریاستی یا دفاعی مفادات تک محدود نہیں بلکہ یہ دلوں کے رشتے ہیں، دونوں ممالک کا دفاعی اشتراک لازوال دوستی کی روشن علامت ہے۔

وزیر اعلیٰ پنجاب نے مزید کہا کہ پیپلز لبریشن آرمی کی پیشہ ورانہ مہارت، جدید عسکری حکمت عملی اور قومی خدمت کا جذبہ مثالی ہے، پاک چین مسلح افواج کے درمیان باہمی اعتماد، تربیتی تعاون اور دفاعی اشتراک وقت کے ساتھ مزید مستحکم ہوا ہے۔

ان کا کہنا تھا کہ پنجاب حکومت دوست ملک کے ساتھ صنعتی ترقی، ماحولیات، زراعت اور تعلیم میں مشترکہ منصوبوں کو مزید فروغ دینے کیلیے پُرعزم ہے۔