پاکستانی اسکواش پلیئر مہوش علی پر 6 ماہ کی پابندی عائد

پاکستانی اسکواش پلیئر مہوش علی کو حریف کھلاڑی کو نازیبا اشارہ کرنا مہنگا پڑ گیا۔

ایشین اسکواش فیڈریشن نے مہوش علی پر چھ ماہ کی پابندی عائد کردی، پاکستانی کھلاڑی کو ایشین جونیئر اسکواش کے پری کوارٹر فائنل میں شکست ہوئی جس پر انہوں نے ہانگ کانگ کی حریف کو نازیبا اشارہ کیا تھا۔

مہوش علی نے ہانگ کانگ کی کھلاڑی سے شکست کے بعد ہاتھ بھی نہیں ملایا تھا۔

اس سے قبل 2023 میں روسی ٹینس اسٹار کارین خچانوف کو آسٹریلین اوپن کے ایک میچ کے دوران نسلی سیاسی اشارے دینے پر وارننگ جاری کی گئی تھی۔ انہوں نے آرمینیا اور آذربائیجان کے تنازع پر ایک متنازع پیغام کیمرا پر لکھ کر دیا تھا، جس پر ان کے خلاف انکوائری شروع ہوئی۔

اگرچہ انہیں پابندی کا سامنا نہیں کرنا پڑا، لیکن ان کا عمل کھیل کے میدان میں سیاست لانے کی کوشش کے طور پر دیکھا گیا، جس پر عالمی میڈیا اور فیڈریشن نے تنقید کی۔