صدر آصف علی زرداری سے وزیراعظم شہباز شریف کی ملاقات ، ملک کی سیاسی اور سیکیورٹی صورتحال پر تبادلہ خیال

صدر مملکت آصف علی زرداری سے وزیراعظم محمد شہباز شریف نے گورنر ہاؤس لاہور میں ملاقات کی۔اتوار کو وزیر اعظم آفس کے میڈیا ونگ سے جاری بیان کے مطابق ملاقات میں اسپیکر قومی اسمبلی سردار ایاز صادق، وزیر داخلہ محسن نقوی، گورنر پنجاب سردار سلیم حیدر خان اور سینیٹر سلیم مانڈوی والا بھی موجود تھے۔

ملاقات میں ملک کی سیاسی اور سیکیورٹی صورتحال پر تبادلہ خیال کیاگیا۔ملاقات میں وزیر اعظم کے دوست ممالک کے حالیہ دوروں پر بھی گفتگو کی گئی۔ملاقات میں سیاسی اتحادیوں کے درمیان تعاون پر بھی تبادلہ خیال کیا گیا۔اس موقع پر صدر مملکت نے کہا کہ حکومت کو عام آدمی کے ریلیف اور فلاح کیلئے آئندہ بجٹ میں اقدامات اٹھانے چاہئیں،سیاسی اتحادیوں کو ملکی مفاد میں مل کر آگے چلنے کی ضرورت ہے۔