بھارتی بیٹر کی انگلینڈ کیخلاف ٹی ٹوئنٹی میں دھواں دار اننگز،کئی اہم ریکارڈز اپنے نام کرلیے

بھارتی کرکٹ ٹیم کے نوجوان بیٹر ابھیشیک شرما نے انگلینڈ کے خلاف ٹی ٹوئنٹی میچ میں دھواں دار اننگز کھیل کر کئی ریکارڈ اپنے نام کرلیے۔

اتوار کو ممبئی میں انگلینڈ اور بھارت کے درمیان پانچواں اور سیریز کا آخری ٹی ٹوئنٹی میچ کھیلا گیا۔

بھارت نے انگلینڈ کی دعوت پر بیٹنگ کرتے ہوئے مقررہ 20 اوورز میں 9 وکٹوں پر247 رنز کا پہاڑ کھڑا کر دیا۔

بھارتی ٹیم کی جانب سے نوجوان اوپنر ابھیشیک شرما نے ریکارڈ ساز اننگز کھیلی۔

ابھیشیک شرما نے37 گیندوں پر سنچری اسکور کی اور مجموعی طور پر 54 گیندوں پر 13 چھکوں اور 7چوکوں کی مدد سے 135 رنز بنائے۔

ابھیشیک نے بھارت کی جانب سے ٹی ٹوئنٹی انٹرنیشنل میں دوسری تیز ترین سنچری اسکور کی۔ اس سے قبل روہت شرما نے 35 گیندوں پر سنچری بنائی تھی۔