آئی سی سی ویمنز انڈر 19 ٹی 20 ورلڈ کپ ،آئرلینڈ نے پاکستان کو شکست دے کر سپر سکس مرحلے کے لیے کوالیفائی کر لیا
آئی سی سی ویمنز انڈر 19 ٹی 20 ورلڈ کپ میں آئرلینڈ نے پاکستان کو ڈک ورتھ لوئس قانون کے تحت 13 رنز سے شکست دے کر سپر سکس مرحلے کے لیے کوالیفائی کر لیا۔
بدھ کو جوہر اکیڈمی اوول میں بارش کی وجہ سے میچ کو 9 اوورز تک محدود کر دیا گیا ۔ آئرلینڈ انڈر 19 نے ٹاس جیت کر پہلے بیٹنگ کی اور مقررہ 9 اوورز میں 5 وکٹوں کے نقصان پر 69 رنز بنائے ۔ آئرلینڈ کی اننگز میں ایلس والش 5 چوکوں کی مدد سے 31 رنز کے ساتھ ٹاپ اسکورر رہیں۔ انابیل 13 رنز بنا کر ناٹ آؤٹ رہیں۔
میمونہ خالد نے دو جبکہ قرۃ العین اور ماہ نور زیب نے ایک ، ایک وکٹ حاصل کی۔ پاکستان انڈر 19 کو ڈک ورتھ لوئس قانون کے تحت 73 رنز کا نظر ثانی ہدف دیا گیا مگر پاکستانی ٹیم جواب میں 7 وکٹوں پر 59 رنز اسکور کرنے میں کامیاب ہو سکی۔ کپتان کومل خان 12 رنز بنا کر ٹاپ اسکورر رہیں۔ ایلی میک گی نے دو کھلاڑیوں کو آؤٹ کیا۔
