حکومتی محکموں کی تعداد کم کرنے اور وسائل کے بہتر استعمال کے لئے رائٹ سائزنگ ضروری ہے، سینیٹر اعظم نذیر تارڑ
وفاقی وزیر برائے قانون سینیٹر اعظم نذیر تارڑ نے کہاکہ حکومتی محکموں کی تعداد کم کرنے اور وسائل کے بہتر استعمال کے لئے رائٹ سائزنگ ضروری ہے،حکومت کا کام کاروبار کرنا نہیں بلکہ ماحول فراہم کرنا ہے تاکہ معیشت ترقی کرے۔
بدھ کوایوان بالاکے اجلاس میں سینیٹر عون عباس نے یوٹیلیٹی اسٹورز کارپوریشن کے مستقبل اور وہاں کے ملازمین کے تحفظ کے حوالے سے سوالات اٹھائے۔
ان کے سوالات کے جواب میں وزیر قانون اعظم نذیر تارڑ نے کہا کہ گردشی قرضے اور مالی خسارے حکومت کے لئے ایک بڑا چیلنج ہیں، جنہیں ختم کرنا معیشت کی بحالی کے لئے ضروری ہے،وہ ملازمین جو اپنی ملازمت کے آخری پانچ سالوں میں ہیں، انہیں ریٹائر کیا جائے گا،ملازمین کو مناسب پیکجز دیے جائیں گے تاکہ ان کے تحفظات کو دور کیا جا سکے،قانون کے تحت کام کرنے والے ملازمین کو بےروزگار نہیں کیا جائے گا۔
سینیٹر ذیشان خانزادہ نے ملازمین کی تعداد اور نئی بھرتیوں پر سوال اٹھایا، خاص طور پر یہ نشاندہی کرتے ہوئے کہا کہ ماضی کی حکومتوں نے غیر ضروری بھرتیاں کیں جس سے قومی ادارے، خاص طور پر پی آئی اے، مسائل کا شکار ہوئے۔وزیر اعظم نذیر تارڑ نے کہا کہ حکومت کا بنیادی کام کاروبار کرنا نہیں بلکہ کاروبار کے لیے سازگار ماحول فراہم کرنا ہے۔
انہوں نے ماضی کی حکومتوں کی غلط پالیسیوں کو پی آئی اے کے مسائل کا ذمہ دار ٹھہرایا۔انہوں نے ادارے کی بہتری کے لئے بھرپور کوششوں کی یقین دہانی کرائی اور پی آئی اے کی بہتری کے لئے ایک جامع پالیسی کے تحت کام کرنے کا ذکر کیا۔انہوں نے اعتراف کیا کہ ہر حکومت میں کچھ بہتری بھی ہوئی اور کچھ غلطیاں بھی کی گئی ہیں۔
