غزہ میں یرغمالیوں اور جنگ بندی کامعاہدہ رواں ہفتے کے اختتام تک مکمل ہو سکتا ہے، ڈونلڈ ٹرمپ

امریکا کے نو منتخب صدر ڈونلڈ ٹرمپ نے کہا ہے کہ وہ سمجھتے ہیں کہ غزہ میں یرغمالیوں اور جنگ بندی کے حوالے سے معاہدہ رواں ہفتے کے اختتام تک مکمل ہو جائے گا۔ العربیہ اردو کے مطابق انہوں نے گزشتہ روز نیوز میکس ویب سائٹ کو دیئے گئے انٹرویو میں کہا کہ میں سمجھتا ہوں کہ بات مصافحے تک پہنچ گئی ہے اور وہ معاہدے کو حتمی شکل دے رہے ہیں، تاہم انھیں اب یہ کر لینا چاہیے ۔

ٹرمپ نے اس حوالے سے مزید تفصیلات نہیں بتائیں۔ انہوں نے کہا کہ وہ آئندہ ہفتے حلف برداری کے بعد بہت جلد روسی صدر ولادیمیر پیوٹن سے ملاقات کریں گے۔انہوں نے کہا کہ جنگ کے خاتمے کے لیے صرف ایک ہی حکمت عملی ہے اور فیصلہروسی صدر کے ہاتھ میں ہے، میرا نہیں خیال کہ جس طرح سے معاملے چلے ہیں وہ اس سے بہت خوش ہوں گے، کیونکہ معاملات ان کے لیے بھی اچھے نہیں رہے۔ نو منتخب امریکی صدر نے کہا کہ میں جانتا ہوں کہ وہ چاہتے ہیں کہ ہماری ملاقات ہو، یہ ملاقات بہت جلد ہو گی۔

میں یہ ملاقات جلد کرنا چاہتا تھا مگر مجھے پہلے صدارت سنبھالنا ہو گی تاکہ بعض امور انجام دے سکوں۔ واضح رہے کہ وائٹ ہاؤس میں ٹرمپ انتظامیہ میں امریکی قومی سلامتی کے آئندہ مشیر مائیک والز نے اتوار کو کہا تھا کہ وہ توقع رکھتے ہیں کہ ڈونلڈ ٹرمپ اور ولادیمیر پیوٹن کے درمیان بات چیت آئندہ دنوں یا ہفتوں میں ہو گی۔ فروری 2022 میں روس ۔ یوکرین جنگ شروع ہونے کے بعد یہ امریکا اور روس کے سربراہان کے درمیان پہلی ملاقات ہو گی۔