ایس ای سی پی نے کریسنٹ سٹار انشورنس لمیٹڈ کے گارنٹی کاروبار کو بند کر دیا

سکیورٹیز اینڈ ایکسچینج کمیشن آف پاکستان (ایس ای سی پی)نے کریسنٹ سٹار انشورنس لمیٹڈ (کریسنٹ سٹار)کے گارنٹی کاروبار کو سیکشن 60، انشورنس آرڈیننس 2000 (آرڈیننس) کے تحت بند کر دیا ،کریسنٹ سٹار نے ضروری ضمانت اور کسی بھی قابل قبول ری انشورنس انتظامات کے بغیر 229 ارب روپے کی گارنٹیز جاری کی تھیں۔

ایس ای سی پی کی طرف سے جاری پریس ریلیز میں کہا گیا ہے کہ کمیشن نے قانونی عمل کی پابندی یقینی بنانے اور کریسنٹ سٹار کو ریگولیٹری فریم ورک کی نمایاں خلاف ورزیوں کے بارے میں اپنے موقف کی وضاحت کرنے کا موقع فراہم کرنے کے لیےاسے 31 جنوری 2024 کو ایک نوٹس جاری کیا تھا تاہم کمپنی نے اس نوٹس کو اسلام آباد ہائی کورٹ میں چیلنج کیا جس کے بعد عدالت نے کریسنٹ سٹار کو کوئی ریلیف نہیں دیا اور اسے ایس ای سی پی کے ذریعے شروع کی گئی کارروائیوں میں حصہ لینے کی ہدایت کی۔

ایس ای سی پی نے کریسنٹ سٹار کو6سماعتوں کے مواقع فراہم کیے اور دوران کارروائی اس کی طرف سے چار تحریری جوابات پیش کیے گئے۔ ان مواقعوں کے باوجودکریسنٹ سٹار گارنٹیز کاروبار کے لیے مناسب ضمانت اور ری انشورنس انتظامات سمیت ریگولیٹری تقاضوں کی تعمیل کا مظاہرہ کرنے میں ناکام رہی۔ انشورنس سیکٹر کی سالمیت کو بچانے کے لیےایس ای سی پی نے اس کا گارنٹی کاروبار بند کر دیا اور ہدایت دی کہ موجودہ گارنٹیز کو کسی بھی صورت میں نہ بڑھایا جائے اور جب واجب ہو تو اپنی ذمہ داریوں کو پورا کریں۔ کریسنٹ سٹار کو بھی ہدایت دی گئی ہے کہ وہ ایس ای سی پی کو ماہانہ بنیاد پر باقی ماندہ گارنٹیز کی تقابلی بیان جمع کرائیں۔

کریسنٹ سٹار ایس ای سی پی کی تسلی کے بعد ریگولیٹری فریم ورک کی ضروریات، یعنی مناسب ضمانت اور قابل قبول ری انشورنس انتظامات حاصل کرنے پر، ہدایت کی منسوخی یا ترمیم کے لیے ایس ای سی پی سے رابطہ کر سکتا ہے۔کریسنٹ سٹار کے علاوہ پاکستان لمیٹڈ کی یونائیٹڈ انشورنس کمپنی کے خلاف بھی اسی طرح کی کارروائیوں کا آغاز کیا گیا ہے کہ وہ گارنٹیز کاروبار کو چلانے کے لیےبظاہر ریگولیٹری تقاضوں کی پابندی کو یقینی بنائے بغیر کارروائی کرے۔ کارروائیاں معطل ہیں کیونکہ یونائیٹڈ انشورنس نے لاہور ہائی کورٹ سے اسٹے آرڈر حاصل کیا ہے۔