قائد اعظم ؒ نے اپنے اعلیٰ کردار اور جدوجہد سے برصغیر کے مسلمانوں کےلئے دو قومی نظریے کی بنیاد پر پاکستان کا قیام ممکن بنایا،چیئرمین سینیٹ سید یوسف رضا گیلانی

چیئرمین سینیٹ سید یوسف رضا گیلانی نے کہا ہے کہ قائد اعظم محمد علی جناح ؒ نے اپنے اعلیٰ کردار ، مستقل مزاجی اور جدوجہد سے برصغیر کے مسلمانوں کو ایک پلیٹ فارم پر اکٹھا کر کے علیحدہ ملک کےلئے جدوجہد شروع کی،برصغیر پاک و ہند کے مسلمانوں کےلئے دو قومی نظریے کی بنیاد پر پاکستان کے قیام کوعملی جامہ پہنایا۔

سینیٹ سیکرٹریٹ میڈیا ونگ سے جاری بیان کے مطابق چیئرمین سید یوسف رضا گیلانی نے بابائے قوم قائداعظم محمد علی جناح کی یوم ولادت کے موقع پر اپنے خصوصی پیغام میں کہا کہ قائد اعظم عظیم لیڈر اور ذہانت و فراصت کے عظیم پیکر تھے۔

انہوں نے کہا کہ قائد اعظم نے اپنے اعلیٰ کردار ، مستقل مزاجی اور جدوجہد سے برصغیر کے مسلمانوں کو ایک پلیٹ فارم پر اکٹھا کر کے علیحدہ ملک کےلئے جدوجہد شروع کی،برصغیر پاک و ہند کے مسلمانوں کےلئے دو قومی نظریے کی بنیاد پر پاکستان کے قیام کوعملی جامہ پہنایا،قیام پاکستان قائد اعظم محمد علی جناح ؒ کی انتھک کاوشوں کا نتیجہ ہے۔

سید یوسف رضا گیلانی نے کہا کہ پوری قوم بانی پاکستان کی خدمات کو خراج عقیدت پیش کرتی ہے اور ہمیشہ ان کی احسان مند رہے گی،بابائے قوم کی دور اندیشی اور سیاسی بصیرت نے قوم کی تقدیر بدلنے کےلئے اتحاد، ایمان اور نظم و ضبط جیسے رہنما اصول وضع کیے۔

چیئرمین سینیٹ نے کہا کہ قیام پاکستان کی تحریک کےلئے محمد علی جناحؒ ایسے ڈٹ کر کھڑے ہوئے کہ اس وقت کی سپر پاور کو ان کے سامنے سرنگوں کرنا پڑا، بانی پاکستان کی تعلیمات اور ان کے فرمودات کی اہمیت موجود ہ دور کے مسائل کو سامنے رکھتے ہوئے مزید اہمیت اختیار کر گئی ہے۔

سید یوسف رضا گیلانی نے کہا کہ ملکی مسائل کی بڑی وجہ یہ بھی ہے کہ ہم نے وہ تعلیمات بھلا دی ہیں جن کی نشاندہی بابائے قوم نے کی تھی،آج ہمیں جن مشکلات کا سامنا ہے ان پر قابو پانے کاواحد راستہ قانون اور آئین پر من وعن عمل درآمد ہے۔

چیئرمین سینیٹ نے کہا کہ ہمیں بانی پاکستان کے رہنما اصولوں پر عمل کرتے ہوئے اپنے مستقبل کو تابناک بنانے کے لئے ہر قسم کے اختلافات کو بالائے طاق رکھ کر پر امن، ترقی پسندانہ اور جمہوری رویوں کو پروان چڑھا نا ہوگا۔سید یوسف رضا گیلانی نے اللّٰہ تعالیٰ سے دعا کی کہ وہ ہم سب کو قائد اعظم ؒکے نقشِ قدم پر چلتے ہوئے وطن عزیز کی تعمیر و ترقی کےلئے مل کر کام کرنے کی توفیق عطا فرمائے۔ آمین۔