مسیحی برادری کو کرسمس مبارک،یہ امن ،محبت اور خوشیاں بانٹنے کا تہوار ہے،گورنر کے پی کے فیصل کریم کنڈی

گورنر خیبر پختونخوا فیصل کریم کنڈی نے کرسمس کے موقع پراپنے پیغام میں کہا ہے کہ ملک بھر بالخصوص خیبرپختونخوا کی مسیحی برادری کو کرسمس کی خوشیوں پر دلی مبارکباد پیش کرتا ہوں،کرسمس امن، محبت، ایک دوسرے کا احترام کرنے اور خوشیاں بانٹنے کا تہوار ہے۔

گورنر نے کہا کہ کرسمس محبت، امن، رواداری، اور بھائی چارے کا پیغام دیتا ہے جو انسانی زندگی کے بنیادی اصول ہیں، ملکی ترقی و خوشحالی اور استحکام میں مسیحی برادری کی خدمات ہمیشہ قابلِ تعریف رہی ہیں۔ انہوں نے کہا کہ ہمارے ملک کا آئین تمام شہریوں کو برابر کے حقوق فراہم کرتا ہے، ہم سب کو مل کر ایک پرامن، خوشحال اور ترقی یافتہ معاشرے کے قیام کے لیے کوششیں کرنی چاہئیں۔

ان کا کہنا تھا کہ وقت کا تقاضا ہے کہ ملک بالخصوص خیبر پختونخوا میں مذہبی ہم آہنگی کو فروغ دیا جائے، اقلیتوں کے حقوق کا تحفظ آئینی طور پر یقینی بنایا گیا ہے تاکہ وہ آزادی کےساتھ اپنی مذہبی رسومات و تقریبات ادا کرسکیں۔انہوں نے کہا کہ ہمیں تمام اختلافات کو بالائے طاق رکھتے ہوئے ایک بہتر اور ہم آہنگ معاشرے کے قیام کے لیے متحد رہنا ہے،بحیثیت پاکستانی ملک کی ترقی، امن اور محبت کے فروغ کے لیے اپنے کردار کو مزید مضبوط بنانا ہے۔