سعودی وزیر دفاع کا دورہ سپین ،ہسپانوی ہم منصب ملاقات

سعودی وزیر دفاع شہزادہ خالد بن سلمان نے سپین کےدورہ کے دوران میڈرڈ میں اپنی ہسپانوی ہم منصب مارگریٹا روبلز سے ملاقات کے دوران دو طرفہ تعلقات، مشترکہ مفاد کے امور اور دفاعی تعاون پر تبادلہ خیال کیا ۔

اردو نیوز کےمطابق شہزادہ خالد بن سلمان نے ایکس پر لکھا کہ ہم نے سعودی، ہسپانوی تعلقات کا جائزہ لیا اور اپنے دفاعی تعاون کو مستحکم کرنے کے مواقع تلاش کیے،ہم نےعلاقائی و بین الاقوامی سلامتی اور استحکام کو فروغ دینے کے طریقوں پر بھی تبادلہ خیال کیا۔قبل ازیں سعودی وزیر دفاع ،ہسپانوی وزارت دفاع کے ہیڈ کوارٹر پہنچے تو سرکاری استقبالیہ تقریب کا انعقاد کیا گیا۔

دونوں ممالک کے ترانے بجائے گئے اور گارڈ آف آنر پیش کیا گیا۔ بعد ازاں دونوں وزرائے دفاع نے وفود کی موجودگی میں بات چیت کی۔یاد رہے کہ سعودی وزیر دفاع اٹلی کے سرکاری دورے کے بعد سپین پہنچے ہیں۔ اٹلی میں انہوں نے ملٹری انڈسٹریز، ریسرچ اینڈ ڈویلپمنٹ اور ٹیکنالوجی کی منتقلی میں تعاون کے مواقع پر بات چیت کی۔