وزیراعظم محمد شہباز شریف کی بیرون ملک تعینات ہونے والے افسرا ن کو پاکستان میں کاروبار ،سرمایہ کاری لانے اور ہنرمند افرادی قوت کیلئے روزگار کے مواقع تلاش کرنے کی ہدایت
وزیراعظم محمد شہباز شریف نے بیرون ملک تعینات ہونے والے افسران کو ہدایت کی ہے کہ وہ پاکستان میں کاروبار اور سرمایہ کاری لانے کے حوالے سے بھی مواقع تلاش کریں، پاکستان کے مفادات کو ہمیشہ ملحوظ خاطر رکھیں ، بیرون ملک پاکستان کا تشخص اجاگر کرنے کے لئے بھرپور کوشش کریں ، پاکستان سے ہنر مند افرادی قوت کے لئے روزگار کے مواقع تلاش کرنے کی بھرپور کوشش کریں کیونکہ سمندر پار پاکستانی ہمارا اثاثہ ہیں جن کی بدولت اربوں ڈالرز کا قیمتی زرمبادلہ پاکستان پہنچتا ہے ۔
جمعرات کو وزیراعظم آفس کے پریس ونگ سے جاری بیان کے مطابق وزیراعظم محمد شہباز شریف سے بیرون ملک پاکستانی مشنز میں نئے تعینات ہونے والے کمیونٹی ولیبر ویلفیئر اتاشیوں نے ملاقات کی۔ وزیراعظم نے کہا کہ مجھے اطمینان ہے کہ آپ لوگوں کا تقرر ایک انتہائی شفاف عمل کے ذریعے ہوا ہے ، بیرون ملک مقیم پاکستانی کمیونٹی کی فلاح و بہبود آپ کی اولین ترجیح ہونی چاہئے ، سمندر پار پاکستانی ہمارا اثاثہ ہیں جن کی بدولت اربوں ڈالرز کا قیمتی زرمبادلہ پاکستان پہنچتا ہے ۔ انہوں نے کہا کہ پاکستان کے مفادات کو ہمیشہ ملحوظ خاطر رکھیں ، بیرون ملک پاکستان کا تشخص اجاگر کرنے کے لئے بھرپور کوشش کریں۔
وزیراعظم نے افسران کو ہدایت کی کہ وہ پاکستان سے ہنرمند افرادی قوت کے لئے روزگار کے مواقع تلاش کرنے کی بھرپور کوشش کریں ، پاکستان میں کاروبار اور سرمایہ کاری لانے کے حوالے سے بھی مواقع تلاش کریں ۔ افسران نے وزیراعظم کو اپنے متعلقہ سٹیشنز کے حوالے سے اپنے لائحہ عمل سے آگاہ کیا ۔ وزیراعظم نے افسران کے لئے نیک خواہشات کا اظہار کیا۔ ملاقات میں وزیر اعظم کے معاون خصوصی طارق فاطمی ، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران بھی موجود تھے۔
