سبکدوش ہونے والے سیکرٹری خارجہ نے پاکستان کی خارجہ پالیسی اور وزارت خارجہ پر انمٹ نقوش چھوڑے ہیں،اسحاق ڈار

نائب وزیر اعظم اور وزیر خارجہ محمد اسحاق ڈار نے کہا ہے کہ آج ہم پاکستان کی فارن سروس کے ایک ایک ایماندار افسر کو الوداع کرتے ہیں، سبکدوش ہونے والے سیکرٹری خارجہ محمد سائرس سجاد قاضی نے گزشتہ 34 سالوں میں پاکستان کی بڑی امتیازی خدمت کی ہے، انہوں نے پاکستان کی خارجہ پالیسی اور وزارت خارجہ پر انمٹ نقوش چھوڑے اور سفارت کاروں کی نئی نسل کو متاثر کیا ہے۔ ان خیالات کا اظہار انہوں نے منگل کو یہاں دفتر خارجہ میں سیکرٹری خارجہ کے اعزاز میں الوداعی تقریب سے خطاب کرتے ہوئے کیا۔

انہوں نے کہا کہ پاکستان کے لیے ان کی نمایاں خدمات کو خراج تحسین پیش کرتے ہیں، تین دہائیوں سے زیادہ عرصے میں وہ پاکستان کی خارجہ پالیسی کا محور رہے اور انہوں عالمی سفارت کاری کی پیچیدگیوں کو عزم اور دیانتداری کے ساتھ نبھایا۔ نائب وزیر اعظم نے کہا کہ بطور سیکرٹری خارجہ اور اس سے قبل ترکی اور ہنگری میں پاکستان کے سفیر کے طور پر انہوں نے پاکستان کے خارجہ تعلقات کو فروغ دینے اور دنیا بھر کے ممالک کے ساتھ شراکت داری کو فروغ دینے میں اپنی شناخت بنائی۔ انہوں نے دنیا بھر میں پاکستان کی سفارتی مصروفیات کی تشکیل میں اہم کردار ادا کیا۔ انہوں نے کہا کہ اعلیٰ سطحی ملاقاتوں کے دوران وہ پاکستان کی خارجہ پالیسی کی ترجیحات اور قومی مفاد کے گہرے ادراک سے جڑی اپنی گہری بصیرت کے ساتھ نمایاں رہے۔ نائب وزیر اعظم نے کہا کہ ہم نے گزشتہ کئی مہینوں سے مل کر کام کیا، میں نے انہیں ایک ذہین اور پاکستان کی خدمت کے لیے مضبوط عزم کے ساتھ ایک شاندار فرد پایا، ان کی سب سے قابل تعریف خصوصیات میں سے ایک جو نمایاں ہے وہ ان کی غیر متزلزل ایمانداری ہے۔ نائب وزیر اعظم نے کہا کہ میں نے انہیں شفافیت اور اخلاقی گورننس کے اصولوں پر سچا پایا، مختصر عرصے میں، میں نے ان کے دانشمندانہ مشوروں اور پاکستان کی خارجہ پالیسی کے چیلنجوں اور ترجیحات کے بارے میں ان کی گہری سمجھ پر بھروسہ کیا۔ انتہائی مشکل حالات کا بھی پرسکون انداز میں جائزہ لینے کی ان کی صلاحیت، اچھا مشورہ دینے اور سب سے اہم بات یہ ہے کہ ان کا اپنے اصولوں پر ثابت قدم رہنا متاثر کن رہا ہے۔ انہوں نے کہا کہ میں نے اس اعتماد کا بھی مشاہدہ کیا جو انہوں نے دوسروں میں قیادت کی سطح پر وزارت کے اندر اور غیر ملکی ہم منصبوں میں پیدا کیا۔

نائب وزیر اعظم محمد اسحاق ڈار نے کہا کہ میں نے وزارت اور تمام افسران اور عملے کی فلاح و بہبود کے لیے ان کی لگن کو پہلی بار دیکھا، میں وزارت کے ہالوں میں ان کی مستقل موجودگی کو یاد کروں گا، جیسا کہ میں جانتا ہوں کہ آپ میں سے بہت سے لوگ بھی ایسا کریں گے۔ انہوں نے کہا کہ مجھے یقین ہے کہ انہوں نے سفارت کاروں کی نئی نسل کو متاثر کیا ہے جو آئندہ کئی دہائیوں تک پاکستان کی خدمت جاری رکھے گی، مجھے یقین ہے کہ فیڈرل پبلک سروس کمیشن کے رکن کی حیثیت سے محمد سائرس سجاد قاضی پاکستان کی فارن سروس کی تعمیر میں اپنا کردار ادا کرتے رہیں گے۔ نائب وزیر اعظم نے کہا کہ پاکستان کے لئے 34 سالہ خدمات میں انہوں نے نہ صرف ہماری خارجہ پالیسی بلکہ وزارت خارجہ پر بھی انمٹ نقوش چھوڑے ہیں، انہوں نے شاندار کامیابیوں سے بھرا ایک ممتاز کیریئر مکمل کرنے پر محمد سائرس سجاد قاضی کو مبارکباد پیش کی۔ انہوں نے کہا کہ پوری وزارت خارجہ اور حکومت پاکستان کی جانب سے میں آپ کی برسوں کی خدمات کے لیے تہہ دل سے شکریہ ادا کرتا ہوں، ہم آپ کی تمام مستقبل کی کوششوں میں آپ کے لیے نیک خواہشات کا اظہار کرتے ہیں۔انہوں نے سبکدوش ہونے والے سیکرٹری خارجہ کے لیے نیک تمناﺅں کا اظہار کیا اور کہا کہ ہم آپ کو یاد کریں گے اور آپ کے تعاون کی ہمیشہ تعریف اور قدر کی جائے گی