خانہ کعبہ کی چابی نئے کلید بردار شیخ عبدالوہاب بن زین العابدین الشیبی کے حوالے کر دی گئی

خانہ کعبہ کے کلید بردار شیخ ڈاکٹر صالح الشیبی کے انتقال کے بعد یہ ذمہ داری شیخ عبدالوہاب بن زین العابدین الشیبی کو سونپ دی گئی ۔اردو نیوز کے مطابق فتح مکہ کے بعد اب تک کلید برداروں میں شیخ عبدالوہاب الشیبی کا 78 واں نمبر ہے جنہیں یہ ذمہ داری سونپی گئی ،گزشتہ دنوں خانہ کعبہ کے 77 ویں کلید بردار (سادن) شیخ ڈاکٹر صالح الشیبی کا 80 برس کی عمر میں انتقال ہوگیا تھا جنہیں مکہ مکرمہ کے معروف قبرستان معلیٰ میں سپرد خاک کیا گیا۔

واضح رہے کہ سادن اس شخص کو کہا جاتا ہے جس کے پاس کعبہ شریف کی چابی ہوتی ہے، کعبہ کے قفل کو کھولنا، بند کرنا اور اندرونی و بیرونی صفائی کے ساتھ ساتھ غلاف کعبہ کی تبدیلی و دیگر امور بھی سادن کے ذمہ ہوتے ہیں۔فتح مکہ کے بعد نبی اکرم ﷺ نے بنو شیبہ کو چابی سونپی اور انہیں یہ ذمہ داری عطا کی تھی اس وقت سے اب تک کلید برداری کی ذمہ داری آل شیبہ کے پاس ہی ہے