عوام الناس ایف آئی اے کے نام سے سوشل میڈ یا پر موصول ہونے والے جعلی نوٹسز پر کوئی ذاتی معلومات ہرگز فراہم نہ کریں، ترجمان

وفاقی تحقیقاتی ادارہ (ایف آئی اے) کی جانب سے عوام الناس کو آگاہ کیا جا رہا ہے کہ حالیہ دنوں میں ایف آئی اے کے نام سے جعلی نوٹسسز وصول ہونے کے واقعات میں اضافہ ہوا ہے، اس طرح کا جعلی اور مشکوک نوٹس موصول ہونے کی صورت میں بھیجنے والے سے ہرگز رابطہ نہ کریں اور کوئی ذاتی معلومات فراہم نہ کریں۔ یہ نوٹسسز مختلف ذرائع جیسے ای میل، واٹس ایپ اور سوشل میڈیا پلیٹ فارمز کے ذریعے پھیلائے جا رہے ہیں۔

ترجمان ایف آئی اے کی طرف سے اتوار کو جاری بیان میں عوام الناس کو آگاہ کیا گیا ہے کہ ان جعلی نوٹسسز پر وصول کنندگان کے مجرمانہ سرگرمیوں میں ملوث ہونے کی جعلی تفصیلات درج ہوتی ہیں اور قانونی کارروائی کی دھمکیاں دے کر یا فوری مالی معاوضہ طلب کرکے خوفزدہ کرنے کا طریقہ استعمال کیا جاتاہے ۔ بعض معاملات میں جعلی افراد تصدیق یا تعمیل کے بہانے حساس ذاتی معلومات حاصل کرنے کی کوشش کی جاتی ہے۔

ایف آئی اے اپنے تمام رابطوں میں سخت ترین پروٹوکول پر عمل پیرا ہے۔ واضح رہے کہ ایف آئی اے میں کسی بھی سرکاری رابطے کا آغاز ایک مکمل تحقیقات اور واضح طور پر شناخت شدہ کیس نمبر کے بعد ہی کیا جاتا ہے۔ اس کے علاوہ ایف آئی اے کبھی بھی حساس معلومات، جیسے بینکنگ کی تفصیلات، نوٹسز یا فون کالز کے ذریعے طلب نہیں کرتا ہے،

اگر آپ کو اس طرح کا جعلی اور مشکوک نوٹس موصول ہوتا ہے، تو بھیجنے والے سے ہرگز رابطہ نہ کریں اور کوئی ذاتی معلومات فراہم نہ کریں۔ اس طرح کے رابطے کی قانونی حیثیت کی تصدیق کے لیے براہ کرم ہماری ہیلپ لائن 1991 یا اپنے قریبی ایف آئی اے سرکل سے رابطہ کریں۔