چین پاکستان تعلقات خطے اور اس سے باہر امن و استحکام کا ذریعہ ہیں، بیجنگ میں پاکستانی سفیر خلیل ہاشمی کا تقریب کے دوران خطاب

چین میں پاکستان کے سفیر خلیل ہاشمی نے کہا ہے کہ پاکستان کو چین کے ساتھ اپنی منفرد اورہر آزمائش پر پوری اترنے والی دوستی پر انتہائی فخر ہے۔ دونوں ممالک نہ صرف زمینی، دریاؤں اور پہاڑوں سے ملے ہوئے ہیں بلکہ دل کی راہداری سے بھی جڑے ہوئے ہیں جو باہمی احترام، اعتماد، یکجہتی اور حمایت کی مشترکہ اقدار پر قائم ہیں۔ انہوں نےبیجنگ میں پاکستانی سفارتخانے کی میزبانی میں پاکستان کے 84ویں قومی دن کی مناسبت سے منعقدہ تقریب کے دوران خطاب کرتے ہوئے اس بات پر زور دیا کہ چین میں پاکستان کے سفیر کے طور پروہ اور ان کی ٹیم دونوں ممالک کی قیادت کے درمیان طے پانے والے اتفاق رائے کو عملی جامہ پہنانے کے لیے پرعزم ہیں تاکہ دونوں ممالک کے درمیان سٹریٹجک اعتماد ،متعدد شعبوں میں تعلقات کو مضبوط کیا جا سکے اور نئے دور میں مشترکہ مستقبل کی چین پاکستان کمیونٹی کو مزید مضبوط بنایا جا سکے۔

اس موقع پر چین کے نائب وزیر خارجہ سن ویڈونگ بھی موجود تھے۔ چین کے نائب وزیر خارجہ نے کہاکہ چین اور پاکستان اچھے پڑوسی، اچھے دوست، اچھے شراکت دار اور اچھے برادر ملک ہیں۔ دونوں ممالک کے درمیان آہنی دوستی قائم ہے جو دونوں ممالک کے عوام کے دلوں کی گہرائی میں ہیں ، چٹان کی طرح مضبوط ہے اور مضبوطی سے بڑھ رہی ہے۔ انہوں نے کہا کہ چین کو یہ دیکھ کر خوشی ہوئی ہے کہ پاکستان کے عام انتخابات بغیر مشکلات منعقد ہوئے اور نئی حکومت قائم ہوئی ہے۔ ہمیں پوری امید ہے کہ پاکستان سماجی استحکام اور معاشی ترقی حاصل کرے گا اور قومی ترقی کے نئے امکانات کھولے گا۔

پاکستانی سفیر نے کہا کہ پاکستان اور چین اور دونوں ممالک کے عوام نے آہنی بھائی چارے کے حقیقی جذبے کے ساتھ اچھے اور مشکل وقت میں کندھے سے کندھا ملا کر کھڑے ہو کر مشکلات پر قابو پایا اور فتح کا جشن منایا۔ انہوں نے کہا کہ ہمارے تعلقات خطے اور اس سے باہر امن اور استحکام کا ذریعہ بنے ہوئے ہیں۔ چین پاکستان اقتصادی راہداری (سی پیک) جو بیلٹ اینڈ روڈ انیشی ایٹو (بی آر آئی) کا اہم منصوبہ ہے، جیت کے تعاون کا ثبوت ہے۔اس موقع پر خطاب کرتے ہوئے خلیل ہاشمی نے بانیان پاکستان خصوصاً قائداعظم محمد علی جناح کو زبردست خراج عقیدت پیش کیا۔ انہوں نے متعدد شعبوں میں کئی دہائیوں کے دوران اہم ملکی پیش رفت پر روشنی ڈالتے ہوئے چیلنجز کا مقابلہ کرنے کے لیے پاکستان کی لچک اور صلاحیت کو اجاگر کیا۔

انہوں نے امن، ہم آہنگی اور ترقی کے فروغ کے لیے بین الاقوامی سطح پر پاکستان کی جانب سے کیے گئے اہم سفارتی اقدامات کا تذکرہ کیا ۔ گلوبل ٹائمز کی رپورٹ کے مطابق پاکستانی سفیر نے چین پاکستان تعلقات کے فروغ میں پاکستانی کمیونٹی کے کردار کو سراہتے ہوئے دونوں ممالک کے درمیان کاروبار اور عوام کے درمیان تبادلے کو مزید وسعت دینے پر زور دیا۔

تقریب میں متعددسینئر چینی حکام، ریذیڈنٹ سفیروں، سفارت کاروں، پاکستانی کمیونٹی کے ارکان، چینی سرکاری اور نجی اداروں کے نمائندوں، دانشوروں اور میڈیا کی سرکردہ شخصیات نے شرکت کی۔ تقریب میں چینی اور پاکستانی بچوں کے گروپ نے استقبالیہ میں پرفارم کیا جو دونوں ممالک کے درمیان پائیدار دوستی کی علامت ہے۔ پاکستان 240 ملین افراد کی آبادی کے ساتھ پانچواں سب سے زیادہ آبادی والا ملک ہے، اور پانچ ہزار سال پر محیط ایک بھرپور اور متنوع ثقافتی ورثہ ہے۔ تقریب میں اس ورثے کی کچھ جھلکیاں دکھائی گئیں۔