پاکستان لبنان کے ساتھ اپنی دیرینہ وابستگی کو انتہائی اہمیت دیتا ہے، باہمی تعلق کو مزید مضبوط بنانے کے لیے پرعزم ہیں، صدر مملکت کا لبنان کے یوم آزادی کے موقع پر پیغام

صدر مملکت آصف علی زرداری نے لبنان کی حکومت اور برادر عوام کو جمہوریہ لبنان کے یوم آزادی کے موقع پر دلی مبارکباد دیتے ہوئے کہا ہے کہ پاکستان لبنان کے ساتھ اپنی دیرینہ وابستگی کو انتہائی اہمیت دیتا ہے اور اس باہمی مفید تعلق کو مزید مضبوط بنانے کے لیے پرعزم ہے۔

ایوان صدر کے میڈیا ونگ سے جاری بیان کے مطابق ان خیالات کا اظہار صدر مملکت آصف علی زرداری نے لبنان کے یوم آزادی کے موقع پر تہنیتی پیغام میں کیا۔ انہوں نے کہا کہ میں لبنان کی حکومت اور برادر عوام کو جمہوریہ لبنان کے یوم آزادی کے موقع پر دلی مبارکباد پیش کرتا ہوں۔

صدر مملکت نے کہا کہ پاکستان اور لبنان کے درمیان کئی دہائیوں پر محیط قریبی اور دوستانہ تعلقات استوار ہیں اور ہم خطے اور دنیا کے متعدد مسائل پر یکساں موقف رکھتے ہیں، پاکستان لبنان کے ساتھ اپنی دیرینہ وابستگی کو انتہائی اہمیت دیتا ہے اور اس باہمی مفید تعلق کو مزید مضبوط بنانے کے لئے پرعزم ہے۔ صدر آصف علی زرداری نے کہا کہ ہمیں پورا یقین ہے کہ لبنان استحکام، ترقی اور خوشحالی کے مستقبل کی جانب پیش قدمی جاری رکھے گا۔ صدر مملکت آصف علی زرداری نے کہا کہ پاکستان اس دو طرفہ تعاون کو قدر کی نگاہ سے دیکھتا ہے جس میں بین الاقوامی فورمز پر ہماری مشترکہ کاوشیں بھی شامل ہیں۔

صدر مملکت نے کہا کہ ہم لبنان کی اس اپیل کی مکمل حمایت کرتے ہیں کہ جنگ بندی کے ضامن ممالک اپنے فرائض پورے کریں اور اسرائیل پر دبائو ڈالیں کہ وہ اپنی جارحانہ کارروائیاں بند کرے، اسرائیلی قابض افواج کو جنگ بندی کے تحت طے شدہ معاہدے کے مطابق جنوبی لبنان سے واپس جانا چاہیے۔ صدر مملکت آصف علی زرداری نے کہا کہ پاکستان اسرائیل کی لبنان کے خلاف فوجی جارحیت، لبنانی خودمختاری کی بارہا خلاف ورزیوں اور شہری علاقوں پر حملوں کی شدید مذمت کرتا ہے جو بین الاقوامی قانون، اقوام متحدہ کے چارٹر اور جنگ بندی کے معاہدے کی صریح خلاف ورزی ہیں،

ہم لبنان کی خودمختاری اور علاقائی سالمیت کی غیر متزلزل حمایت کا اعادہ کرتے ہیں اور عالمی برادری سے مطالبہ کرتے ہیں کہ جنگ بندی پر سختی سے عمل درآمد کو یقینی بنایا جائے اور بے گھر ہونے والے لبنانی شہریوں کی محفوظ واپسی میں مدد کی جائے۔ صدر مملکت نے کہا کہ پاکستان لبنانی عوام کے ساتھ شانہ بشانہ کھڑا ہے۔انہوں نے کہا کہ آج جب لبنان اپنا یوم آزادی منا رہا ہے، پاکستان کے عوام اپنے لبنانی بھائیوں اور بہنوں کے ساتھ دیرپا امن، استحکام اور خوشحالی کے لیے دعاگو ہیں، پاکستان لبنان کو ہرممکن تعاون فراہم کرتا رہے گا اور باہمی احترام، مشترکہ امنگوں اور دائمی دوستی پر مبنی مستقبل کے لیے مل کر کام کرنے کے عزم کا اظہار کرتا ہے۔