وزیراعظم شہباز شریف کی قومی ایئر لائن کی نجکاری کے حوالے سے تمام مراحل تیز رفتاری اور شفاف طریقے سے مکمل کرنے کی ہدایت

وزیراعظم محمد شہباز شریف نے قومی ایئر لائن کی نجکاری کے حوالے سے تمام مراحل تیز رفتاری اور شفاف طریقے سے مکمل کرنے کی ہدایت کی ہے۔ وزیر اعظم آفس کے میڈیا ونگ کی طرف سے جاری بیان کے مطابق وزیراعظم محمد شہباز شریف کی زیر صدارت پاکستان انٹر نیشنل ایئرلائنز(پی آئی اے ) کے امور پر اہم اجلاس جمعرات کو یہاں وزیر اعظم ہائوس میں منعقد ہوا۔

اجلاس میں وزیر دفاع خواجہ محمد آصف ، وفاقی وزیر قانون و انصاف اعظم نذیر تارڑ ، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب ، وزیراعظم کے مشیر برائے نجکاری محمد علی اور متعلقہ حکام نے شرکت کی۔

وزیراعظم نے قومی ایئر لائن کی نجکاری کے حوالے سے تمام مراحل تیز رفتاری اور شفاف طریقے سے مکمل کرنے، پی آئی اے کے فلیٹ میں قابل پرواز طیاروں کی تعداد بڑھانے کے لئے لائحہ عمل ترتیب دینے ، پی آئی اے کی پروازوں کی بروقت روانگی یقینی بنانے کی ہدایت کی۔

اجلاس میں پی آئی اے کی نجکاری اور اس حوالے سے بزنس پلان پر تفصیلی بریفنگ دی گئی جس میں بتایا گیا کہ پی آئی اے کی نجکاری کے حوالے سے 4 پارٹیز کو پری-کوالیفائی کیا گیا ہے ، جلد ہی پی آئی اے کی نجکاری کے حوالے سے بڈنگ ہو گی، پی آئی اے کے 75 فیصد شیئرز کی نجکاری ہوگی، نجکاری کے حوالے سے یہ شرط رکھی گئی ہے کہ نجکاری کے بعد پی آئی اے کا نام اور اس کی تھیم نہیں بدلی جائے گی، بزنس پلان کے تحت 2029ء میں پی آئی اے فلیٹ میں قابل پرواز طیاروں کی تعداد 18 سے بڑھا کر 38 کی جائے گی۔

وزیر اعظم کو بتایا گیا کہ اس وقت قومی ایئر لائن 30 سے زائد شہروں میں سروس مہیا کر رہی ہے ، بزنس پلان کے تحت 2029ء تک پی آئی اے کی سروسز 40 سے زائد شہروں تک بڑھائی جائیں گی۔