بینکوں کے کھاتوں ، زیر گردش کرنسی اور زر وسیع (ایم ٹو) میں ہفتہ وار بنیادوں پر اضافہ

بینکوں کے کھاتوں ، زیر گردش کرنسی اور زر وسیع (ایم ٹو) میں ہفتہ وار بنیادوں پر اضافہ ریکارڈ کیا گیا ہے ۔ سٹیٹ بینک کی جانب سے جاری کردہ اعدادوشمار کے مطابق 17 اکتوبر کو ختم ہونے والے ہفتے میں بینکوں کے کھاتوں کا حجم 28 ہزار 929 ارب روپے ریکارڈ کیا گیا جو پیوستہ ہفتے کے مقابلے میں 0.7 فیصد زیادہ ہے۔ پیوستہ ہفتے کے اختتام پر بینکوں کے کھاتوں کا حجم 28 ہزار 742 ارب روپے ریکارڈ کیا گیا تھا۔ جاری مالی سال کے آغاز سے لے کر اب تک بینکوں کے کھاتوں میں مجموعی طور پر 3.9 فیصد کی کمی ہوئی ہے۔

سٹیٹ بینک کے مطابق 17 اکتوبر کو ختم ہونے والے ہفتے میں زر وسیع کا حجم 39 ہزار 793 ارب روپے ریکارڈ کیا گیا جو پیوستہ ہفتے کے مقابلے میں 0.5 فیصد زیادہ ہے۔ پیوستہ ہفتے کے اختتام پر زر وسیع کا حجم 39 ہزار 585 ارب روپے ریکارڈ کیا گیا تھا ۔ جاری مالی سال کے آغاز سے لے کر اب تک زر وسیع میں مجموعی طو رپر 2.5 فیصد کی کمی ہوئی ہے۔

سٹیٹ بینک کے مطابق 17 اکتوبر کو ختم ہونے والے ہفتے میں زیر گردش کرنسی کا حجم 10 ہزار 801 ارب روپے ریکارڈ کیا گیا جو پیوستہ ہفتے کے مقابلے میں 0.1 فیصد زیادہ ہے۔ پیوستہ ہفتے کے اختتام پر زیر گردش کرنسی کا حجم 10 ہزار 793 ارب روپے ریکارڈ کیا گیا تھا۔ جاری مالی سال کے آغاز سے لے کر اب تک زیر گردش کرنسی کے حجم میں مجموعی طور پر 1.6 فیصد کا اضافہ ریکارڈ کیا گیا ہے۔