یو اے ای کی تاریخ کی سب سے بڑی لاٹری جیتنے والا نوجوان کون؟ شناخت سامنے آگئی

متحدہ عرب امارات کی تاریخ کی سب سے بڑی لاٹری جیتنے والے خوش قسمت شخص کی شناخت ظاہر کر دی گئی۔

خلیجی میڈیا کے مطابق ابوظبی میں مقیم 29 سالہ انیل کمار بولا نے 100 ملین درہم کی لاٹری جیتی۔

انہوں نے کہا کہ میں نے لاٹری کے لیے کوئی خاص حربہ استعمال نہیں کیا تھا، بس اپنی والدہ کی سالگرہ کے مہینے کی مناسبت سے 11 نمبر کا انتخاب کیا تھا اور ایک ہی باری میں 12 ٹکٹس خریدے تھے۔

انیل کمار بولا کا کہنا ہے لاٹری جیتنا کسی خواب سے کم نہیں، بار بار دہراتا ہوں کہ 100 ملین درہم انعام جیت چکا ہوں، جب انعام جیتنے کا پتہ چلا تو سکتے میں آ گیا تھا۔

انہوں نے اپنی خواہش کا اظہار کرتے ہوئے کہا ایک سپر لگژری کار خریدوں گا اور اپنی خوشی کا جشن سیون اسٹار ہوٹل میں مناؤں گا، خاندان کو ابوظبی منتقل کروں گا اور ان کی مالی مدد کروں گا۔

انیل کمار بولا کا کہنا ہے میں چاہتا ہوں کہ اس رقم کو اپنی سوچ کے مطابق صحیح راستے پر لگاؤں، انعامی رقم کا کچھ حصہ فلاحی کاموں پر خرچ کروں گا۔