وفاقی وزیر داخلہ محسن نقوی سے گورنر خیبرپختونخوا فیصل کریم کنڈی کی ملاقات، صوبے میں امن و امان، دہشتگردی اور جاری آپریشنز بارے تبادلہ خیال کیا
وفاقی وزیر داخلہ محسن نقوی سے گورنر خیبرپختونخوا فیصل کریم کنڈی نے ملاقات کی جس میں خیبرپختونخوا میں امن و امان کی مجموعی صورتحال، دہشتگردی کے حالیہ واقعات اور جاری آپریشنز بارے تفصیلی تبادلہ خیال کیا گیا۔ترجمان وزارت داخلہ کے مطابق ملاقات میں فتنہ الخوارج کے خلاف مختلف اضلاع میں جاری کارروائیوں، پاک افغان سرحدی حالات اور دہشتگردی کے خاتمے کے لیے کیے کیے گئے اقدامات بارے بھی گفتگو ہوئی۔
دونوں رہنمائوں نے خیبرپختونخوا میں پائیدار امن کے قیام کے لیے سکیورٹی فورسز کی قربانیوں کو سراہا اور ان کی خدمات کو خراجِ تحسین پیش کیا۔محسن نقوی نے کہا کہ پولیس ٹریننگ سنٹر اور نادرا آفس ڈیرہ اسماعیل خان پر حملوں میں شہید ہونے والے اہلکاروں کو پوری قوم سلام پیش کرتی ہے۔ انہوں نے متاثرہ عمارتوں کی ازسرِ نو بحالی کے عمل بارے بھی گفتگو کی۔
وزیر داخلہ کا کہنا تھا کہ خیبرپختونخوا کے عوام اور قانون نافذ کرنے والے ادارے بہادری سے دہشتگردی کے ناسور کا مقابلہ کر رہے ہیں،فتنہ الہندوستان کے دہشتگرد پاکستان کی یکجہتی اور امن کے دشمن ہیں، ان درندہ صفت عناصر کے خلاف آپریشنز جاری رہیں گےاور ہم پاکستان کی سرزمین سے فتنہ الہندوستان کا خاتمہ کرکے دم لیں گے۔
محسن نقوی نے واضح کیا کہ وفاقی حکومت صوبے میں امن و امان کے قیام اور انسدادِ دہشتگردی کے لیے بھرپور تعاون فراہم کر رہی ہے،بھارتی حمایت یافتہ دہشتگردوں کے مذموم عزائم ہرگز کامیاب نہیں ہوں گے۔گورنر خیبرپختونخوا فیصل کریم کنڈی نے کہا کہ خیبرپختونخوا کے عوام امن کے داعی ہیں، صوبے کی ترقی و خوشحالی کے لیے امن ناگزیر ہےاور ملک و قوم کے دشمنوں کے خلاف انٹیلی جنس بیسڈ آپریشنز وقت کی ضرورت ہیں۔
دونوں رہنماؤں نے اس عزم کا اظہار کیا کہ ملک دشمن عناصر کے خلاف کارروائیاں پوری قوت سے جاری رہیں گی تاکہ صوبے میں پائیدار امن کو یقینی بنایا جا سکے
