مراکش کی تاریخی فتح ،ارجنٹائن کو ہرا کر پہلی مرتبہ انڈر20فٹ بال ورلڈکپ جیت لیا
محمد یاسر زبیری کی عمدہ کارکردگی کی بدولت مراکش کی فٹ بال ٹیم نے پہلی مرتبہ انڈر 20ورلڈ کپ فٹ بال ٹورنامنٹ جیت لیا۔ای ایس پی این کے مطابق فیفا کے زیر اہتمام چلی میں جاری 24 ویں انڈر 20ورلڈ کپ فٹ بال ٹورنامنٹ کے فائنل میچ میں مراکش نے شاندار کارکردگی کا مظاہرہ کرتے ہوئے ارجنٹائن جیسی سخت ٹیم کو 0-2 گول سے شکست دے کر پہلی مربتہ چیمپئن ہونے کا اعزاز حاصل کرلیا۔
محمد یاسر زبیری نے 2 گول کر کے اپنی ٹیم مراکش کی فتح میں اہم کردار ادا کیا۔یاسر زبیری کو ان کی شاندار کارکردگی پر میچ کا بہترین کھلاڑی قرار دیا گیا۔ انڈر 20فٹ بال ورلڈ کپ کے چلی میں سجے عالمی میلے میں شائقین فٹ بال کو انتہائی دلچسپ اور کانٹے دار مقابلے دیکھنے کو ملے جس کے جولیو مارٹینیز پرادانوس نیشنل سٹیڈیم، سانتیاگومیں کھیلے گئے فائنل میچ میں مراکش اور ارجنٹائن کی ٹیمیں آمنے سامنے تھیں ،فائنل میچ میں مراکش کی ٹیم نے شاندار کارکردگی کا مظاہرہ کرتے ہوئے مضبوط حریف ارجنٹائن کی ٹیم کو 0-2 گول سے نہ صرف شکست دی بلکہ پہلی مرتبہ انڈر 20ورلڈ کپ فٹ بال ٹورنامنٹ بھی جیت لیا۔
محمد یاسر زبیری نے بالترتیب 12 اور29 ویں منٹ میں دو گول کر کے اپنی ٹیم کی فتح میں کلیدی کردار ادا کیا۔ یہ مراکش کی پہلی ورلڈ کپ فتح ہے، جو براعظم افریقاکے لیے بھی ایک قابلِ فخر لمحہ ہے۔اس سے قبل مراکش کی ٹیم نے ناک آؤٹ مرحلے میں جنوبی کوریا، امریکہ اور فرانس جیسی مضبوط ٹیموں کو شکست دے کر فائنل میں جگہ بنائی تھی۔ مراکش 2009 کے بعد انڈر-20 ورلڈ کپ جیتنے والا پہلا افریقی ملک بن گیا جبکہ آخری بار گھانا نے یہ اعزاز حاصل کیا تھا۔
ارجنٹائن کی ٹیم جو ٹورنامنٹ کی سب سے کامیاب ٹیموں میں شمار تھی ، فائنل تک ناقابلِ شکست رہی تاہم وہ اپنے دو اہم کھلاڑیوں بائر لیورکوزن کے کلاڈیو ایچیواری اور ریئل میڈرڈ کے فرانکو ماستانتوانو کی عدم موجودگی سے متاثر دکھائی دی۔یاسر زبیری کو ان کی شاندار کارکردگی پر میچ کا بہترین کھلاڑی قرار دیا گیا۔
