بھارت نے سیلاب سے متعلق تفصیلی معلومات فراہم نہیں کیں، ترجمان دفتر خارجہ

ترجمان دفتر خارجہ شفقت علی خان کا کہنا ہے کہ بھارت نے دریاؤں میں سیلاب سے متعلق سفارتی ذرائع سے کچھ معلومات دیں جو تفصیلی نہیں تھیں۔

ترجمان دفتر خارجہ نے بتایا کہ بھارت نے انڈس واٹر کمشنر کا طے شدہ چینل استعمال نہیں کیا اور سفارتی ذرائع سے جو معلومات دی گئیں وہ تفصیلی نہیں تھیں۔

ترجمان دفترخارجہ نے زور دیا کہ بھارت کو سندھ طاس معاہدے کی تمام شقوں پر مکمل عمل کرنا چاہیے۔

ترجمان دفتر خارجہ کا کہنا تھا کہ سیلاب سے متعلق فلیش اپیل کا فیصلہ نیشنل ڈیزاسٹر منیجمنٹ اتھارٹی ( این ڈی ایم اے) کرے گی اور وزارت خارجہ ہر فیصلے پر عمل کے لیے تیار ہے۔

یاد رہے کہ بھارت نے آبی دہشتگردی کا سلسلہ برقرار رکھتے ہوئے دریائے ستلج اور راوی میں پانی چھوڑ دیا تھا جس کے باعث پاکستان کے کئی علاقوں میں سیلابی صورتحال پیدا ہوگئی جو تاحال برقرار ہے۔

سیلاب کے باعث لوگوں کے مال مویشی، گھر، بستیاں سب ڈوب گئے اور عارضی کیمپوں میں رہائش اختیار کیے سیلاب متاثرین حکومتی امداد کے منتظر ہیں۔