وزیراعظم شہباز شریف کی این ڈی ایم اےکو سیلابی صورتحال کے پیش نظر امدادی کارروائیوں کی تیاری مکمل رکھنے کی ہدایت
وزیراعظم محمد شہباز شریف نے نیشنل ڈیزاسٹرمینجمنٹ اتھارٹی(این ڈی ایم اے) کو سیلابی صورتحال کے پیش نظر امدادی کارروائیوں کی تیاری مکمل رکھنے کی ہدایت کی ہے۔وزیراعظم آفس کے میڈیا ونگ کی طرف سے جاری بیان کے مطابق یہ ہدایت انہوں نے پیرکو ملک میں سیلابی صورتحال اور جاری ریسکیو و امدادی کارروائیوں کے حوالے سے جائزہ اجلاس کی صدارت کرتے ہوئے کی۔اجلاس میں چیئرمین این ڈی ایم اے لیفٹیننٹ جنرل انعام حیدر ملک نے وزیراعظم شہباز شریف کو ملک بھر میں دریاؤں میں طغیانی، سیلابی ریلوں کی موجودہ صورتحال اور سیلاب سے متاثرہ شہریوں کے لیے امدادی کارروائیوں کے حوالے سے بریفنگ دی۔
وزیراعظم نے این ڈی ایم اے کو ملک میں جاری امدادی کارروائیوں کو تیز کرنے اور بڑھتی ہوئی طغیانی سے ممکنہ سیلابی صورتحال کے پیش نظر امدادی کارروائیوں کی تیاری مکمل رکھنے کی ہدایت کی ۔انہوں نے دریاؤں سے ملحقہ آبادیوں اور ممکنہ خطرے سے دوچار علاقوں میں پیشگی اطلاع اور بروقت انخلاء کے حوالے سے بھی مکمل تیاری اور این ڈی ایم اے کو صوبائی حکومتوں اور صوبائی ڈیزاسٹر مینجمنٹ اتھارٹیوں کے ساتھ مکمل تعاون برقرار رکھنے کی ہدایت بھی کی۔ وزیراعظم نے حکم دیا کہ سیلاب میں لاپتہ افراد کی تلاش کا عمل تیز کیا جائے۔
وزیراعظم کو ملک میں سیلاب کی وجہ سے نقل مکانی کرنے والے افراد اور ریسکیو کارروائیوں کے حوالے سے بھی بریفنگ دی گئی۔بریفنگ کے دوران وزیراعظم کو دریائے چناب، راوی اور ستلج میں تریمو ں بیراج، پنجند بیراج، ہیڈ بلوکی، ہیڈ سدھنائی، گنڈا سنگھ والا، ہیڈ سلیمانکی اور ہیڈ اسلام میں شدید طغیانی کی صورتحال سے آگاہ کیا گیا۔بریفنگ میں بتایا گیا کہ سیلاب سے متاثرہ علاقوں کے لیے امدادی سامان کے قافلے تسلسل سے بھیجے جا رہے ہیں۔
