وزیر اعظم شہباز شریف سے چین کے وزیر صنعت و آئی ٹی لی لیچینگ کی ملاقات، وزیراعظم کا سی پیک فیز II کے حوالے سے پیشرفت پر اطمینان کا اظہار
وزیر اعظم محمد شہباز شریف نے چین۔پاکستان اقتصادی راہداری کو پاکستان کی سماجی و اقتصادی ترقی کا مرکزی ستون قرار دیتے ہوئے سی پیک فیز II کے حوالے سے مسلسل پیشرفت پر اطمینان کا اظہار کیا ہے۔وزیراعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف سے چین کے وزیر صنعت و انفارمیشن ٹیکنالوجی لی لیچینگ نے جمعرات کو یہاں ملاقات کی۔
وزیراعظم نے چین کے ساتھ صنعت، زراعت، تجارت، انفارمیشن اینڈ کمیونیکیشن ٹیکنالوجی، کان کنی اور معدنیات کے شعبوں میں دوطرفہ تعاون کو مزید گہرا کرنے کے پاکستان کے وژن کا اعادہ کیا۔ انہوں نے چین-پاکستان اقتصادی راہداری کو پاکستان کی سماجی و اقتصادی ترقی کا مرکزی ستون قرار دیا اور سی پیک فیز II میں مسلسل پیش رفت پر اطمینان کا اظہار کیا۔
وزیر اعظم کے اقتصادی اصلاحات کے ایجنڈے کو سراہتے ہوئے چینی وزیر لی لیچینگ نے اس بات پر زور دیا کہ چین پاکستان کو اپنا گہرا دوست اور سدا بہار تزویراتی شراکت دار سمجھتا ہے۔ انہوں نے پاکستان کے ساتھ دوطرفہ تعلقات کو تعاون اور اشتراک کی نئی بلندیوں تک پہنچانے کے لیے چین کے پختہ عزم کااظہار کیا۔
