400 روپے مزدور کی دیہاڑی نہیں اورہمیں الاؤنس دینے کا کہا جا رہا ہے: ہاکی ٹیم کے کھلاڑی ناراض

لاہور : پاکستان ہاکی ٹیم کے کھلاڑیوں نے شکوہ کیا ہے کہ 400 روپے کے ڈیلی الاؤنس کی بات کرنا زخموں پر نمک چھڑکنا ہے۔

قومی ہاکی ٹیم کے کھلاڑیوں کا مؤقف ہے کہ 400 روپے تو مزدور کی دیہاڑی نہیں ہے اور ہمیں ڈیلی الاؤنس دینے کا کہا جا رہا ہے، یہ ہماری بے عزتی ہے ، اس سے بڑھ کر آپ کسی کی کیا بے قدری کریں گے۔

کھلاڑیوں کا کہنا ہےکہ روزگار ہے نہیں ، ڈیلی الاؤنس پہلے بھی وقت پر نہیں ملتا اور اب 400 روپے کی بات کی جا رہی ہے، اگر یہی حالات رہے تو ہاکی چھوڑنے پر مجبور ہوں گے، ملک نے ہمیں بہت کچھ دیا ، ملک کی وجہ سے سب کچھ ہے لیکن 400 روپے کا سن کر دکھ ہوا۔

ان کا کہنا تھا کہ کھلاڑیوں کے گھروں کے چولہے ٹھنڈے پڑ رہے ہیں اور ہمارے ڈیلی الاؤنس کی سب کو تکلیف ہے۔

دوسری جانب پاکستان ہاکی فیڈریشن (پی ایچ ایف) کے سیکرٹری رانا مجاہد نے بتایا کہ پی ایس بی نے 400 روپے ڈیلی الاؤنس دینے کا کہا، ہاکی فیڈریشن 100 ڈالر ڈیلی الاؤنس دیتی ہے، کھلاڑی 100 ڈالرز سے مطمئن نہیں تو 400 روپے پر کیسے کھیلیں گے۔