پاکستان اور بیلا روس کے مابین دوستانہ تعلقات وقت کے ساتھ مزید مستحکم ہو رہے ہیں، وزیر اعظم شہباز شریف
وزیر اعظم محمد شہباز شریف نے ہنرمند پاکستانی افرادی قوت کو بیلاروس میں ملازمتوں کی فراہمی کیلئے دونوں ممالک کے مابین مفاہمتی یادداشت پر دستخطوں کا خیر مقدم کرتے ہوئے کہا ہے کہ پاکستان اور بیلا روس کے مابین دوستانہ تعلقات وقت کے ساتھ مزید مستحکم ہو رہے ہیں۔ وزیر اعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف سے بیلا روس کے وزیر داخلہ ایون کبراکوو کی سربراہی میں وفد نے بدھ کو یہاں ملاقات کی۔
وزیراعظم نے بیلاروس کے وزیر داخلہ کا پاکستان آمد پر خیر مقدم کرتے ہوئے کہا کہ پاکستان اور بیلا روس کے درمیان دوستانہ تعلقات ہیں ،جو وقت کے ساتھ مزید مضبوط ہو رہے ہیں۔ انہوں نے رواں سال اپنے دورہ بیلاروس کا ذکر کرتے ہوئے بیلاروس کے صدر الیگزینڈر لوکاشینکو کے لئے اپنی نیک خواہشات کا اظہار کیا۔ انہوں نے کہا کہ ان کے دورہ بیلاروس کے دوران پاکستان اور بیلا روس کے مابین مختلف شعبوں میں تعاون کے کئی معاہدوں اور مفاہمتی یادداشتوں پر دستخط ہوئے۔ انہوں نے کہا کہ مجھے خوشی ہے کہ میرے دورہ بیلاروس کے دوران پاکستان سے ہنر مند افراد کو بیلا روس میں مختلف شعبوں میں ملازمتوں کے مواقع فراہم کرنے کے حوالے سے دونوں ممالک میں جو اتفاق ہوا تھا ،آج اس حوالے سے دونوں ممالک نے مفاہمتی یادداشت پر دستخط کئے ہیں۔
وزیراعظم نے کہا کہ ہم بیلا روس کے صدر کے پاکستان کے دورے کے منتظر ہیں۔بیلا روس کے وزیر داخلہ نے پاکستان میں پرتپاک استقبال اور میزبانی پر وزیراعظم کا شکریہ ادا کیا ۔ انہوں نے وزیراعظم کو بیلاروس کے صدر کی طرف سے نیک خواہشات کا پیغام پہنچایا۔ انہوں نے پاکستان کے ساتھ زراعت اور صنعت سمیت مختلف شعبوں میں تعاون بڑھانے اور مل کر کام کرنے کی خواہش کا اظہار کیا۔ انہوں نے دورے کے دوران وفاقی وزیر داخلہ محسن نقوی اور وفاقی وزیر سمندر پار پاکستانی و انسانی وسائل چوہدری سالک حسین سے اپنی ملاقاتوں کا ذکر کرتے ہوئے کہا کہ یہ ملاقاتیں دونوں ممالک کے درمیان تعلقات کو آگے بڑھانے کے حوالے سے انتہائی مفید رہیں۔
وفاقی وزیر داخلہ محسن نقوی نے وزیراعظم کو آگاہ کیا کہ بیلاروس کے وزیر داخلہ نے وفد کے ہمراہ نیشنل ڈیٹا بیس رجسٹریشن اتھارٹی کا دورہ بھی کیا۔ وفاقی وزیر سمندر پار پاکستانی و ترقی انسانی وسائل چوہدری سالک نے بتایا کہ ہنر مند پاکستانیوں کو بیلاروس بھجوانے کے حوالے سے دونوں ممالک کے مابین مفاہمتی یادداشت پر دستخط ہوئے ہیں جس کے بعد ہنر مند پاکستانیوں کو بیلا روس بھجوانے کا عمل باقاعدہ شروع ہو جائے گا۔
بیلا روس پاکستانی ہنر مند افرادی قوت کو میڈیکل سمیت سماجی تحفظ کی دیگر سہولیات بھی فراہم کرے گا۔ ملاقات کے موقع پر وفاقی وزیر داخلہ محسن نقوی ، وفاقی وزیر سمندر پار پاکستانی و ترقی انسانی وسائل چوہدری سالک حسین، وزیر مملکت برائے داخلہ طلال چوہدری، وزیر مملکت برائے سمندر پار پاکستانی و ترقی انسانی وسائل محمد عون چوہدری اور اعلیٰ سرکاری افسران بھی موجود تھے۔
